பைல் டீடெய்ல்ஸ் செட் செய்யலாமா?

உங்களுடைய பைல் அல்லது போல்டர் குறித்த தகவல்களை நீங்கள் எப்போதாவது தேடியதுண்டா? அது எப்போது தயாரிக்கப்பட்டது? எப்போது மீண்டும் எடிட் செய்யப்பட்டது? யார் அதனைத் தயாரித்தது? பைல் எந்த வகையைச் சார்ந்தது? போன்ற இன்னும் பல விவரங்கள் குறித்து அறிய வேண்டும் என ஆசை உண்டா? உண்டு என்றால் பார்த்துத் தெரிந்து கொள்ளலாம்.

போல்டரில் உள்ள பைல்களை Details வகையில் பார்க்கும் போது பைலின் பெயர், அளவு, வகை மற்றும் இறுதியாக எடிட் செய்யப்பட்ட தேதி ஆகியவை காட்டப்படுகின்றன. இதற்கு மேலும் விபரங்கள் தேவை என்றால் காட்டப்படும் விதத்தில் மாற்றங்கள் மேற்கொள்ளப்பட வேண்டும்.

இதற்கு Start அழுத்தி கிடைக்கும் கட்டங்களில் My Documents என்பதில் கிளிக் செய்திடவும். இங்கு நீங்கள் தகவல்கள் தேவைப்படும் பைல் அல்லது போல்டரை சிங்கிள் கிளிக் செய்து தேர்ந்தெடுக்கவும். தேர்ந்தெடுத்தபின் மெனு பார் சென்று View மெனுவில் கிளிக் செய்திடவும்.

பின் ஸ்குரோல் வீலைச் சுழற்றி கீழாக Choose Details என்று இருக்கும் இடத்தில் மீண்டும் கிளிக் செய்திடவும். இப்போது Choose Details டயலாக் பாக்ஸ் உங்களுக்குக் கிடைக்கும். இதில் பல்வேறு (44) வகை தகவல்களுக்கான லேபிள்கள் அடுக்கப்பட்டிருக்கும். உங்களுக்கு எவை எல்லாம் வேண்டுமோ அதற்கான கட்டங்களில் டிக் அடையாளத்தை ஏற்படுத்தலாம். தேவையற்றதற்கான லேபிள்களின் டிக் அடையாளத்தை எடுத்துவிடலாம். தேர்ந்தெடுக்கப்பட்ட தகவல்கள் எந்த வரிசையில் காட்டப்பட வேண்டும் என்பதனை நீங்கள் நிர்ணயம் செய்துவிடலாம். இதற்கு Move Up அல்லது Move Down பட்டனை அழுத்தி அமைக்க வேண்டும்.

தேர்ந்தெடுக்கப்பட்டவற்றை காட்ட வேண்டுமா அல்லது மறைக்க வேண்டுமா என்பதனையும் முடிவு செய்திடலாம். இதற்கு Show அல்லது Hide பட்டனை அழுத்த வேண்டும். எல்லாம் செட் செய்த பின் ஓகே கிளிக் செய்திடுங்கள்.

விண்டோவை நகர்த்துவது எதற்கு?

விண்டோவை நகர்த்துவதா? எதற்காக? மேலே படியுங்கள். கீழ்க்காணும் சூழ்நிலையை ஒரு கணம் சிந்தித்துப் பாருங்கள். நீங்கள் உங்கள் கம்ப்யூட்டரில் பணியாற்றிக் கொண்டிருக்கிறீர்கள். மானிட்டர் திரையில் நீங்கள் பிரவுசிங் செய்து கொண்டிருக்கும் தளத்தின் காட்சி தெரிகிறது. அதற்கு முன்னால் நீங்கள் உருவாக்கிக் கொண்டிருந்த வேர்ட் டாகுமெண்ட்டும் பின்னால் உள்ளது.

இரண்டையும் திரையின் முழு அளவில் திறந்து வைத்திருப்பதால் ஏதாவது ஒன்றைத்தான் ஒரு நேரத்தில் பார்க்க முடியும். ஒரு விண்டோவினைத் தள்ளி வைத்து இன்னொன்றைப் பார்க்க வேண்டும் என்றால் ஒன்றும் செய்ய முடியாதே?. அல்லது டெஸ்க்டாப் திரையில் இருக்கும் ஐகான் ஒன்றைக் கிளிக் செய்து இன்னொரு புரோகிராமினை இயக்க வேண்டும் என்றால் முடியாதே?

கவலைப்படாதீர்கள். இதனை ஒரு சிறிய விஷயத்தை செட் செய்வதன் மூலம் சீராக்கி விடலாம். எந்த விண்டோவினை நகர்த்த எண்ணுகிறீர்களோ அதனை restore down செய்திடுங்கள். அது என்ன என்கிறீர்களா? ஒரு பைல் திறந்திருக்கையில் மேலாக வலது மூலையில் மூன்று கட்டங்கள் தெரிகிறதா? அதில் மினிமைஸ் பட்டனுக்கும் குளோஸ் பட்டனுக்கும் நடுவில் உள்ளதே அதுதான் ரெஸ்டோர் பட்டனாகும். இதனைக் கிளிக் செய்தால் அந்த விண்டோ சிறியதாகும்.

இதனால் நீங்கள் அதில் செயல்படுவது பாதிக்கப்படாது. இது சிறியதான பிறகு இதன் தலையில் மவுஸின் கர்சரை வைத்து இழுத்து விண்டோவினை எங்கு வேண்டுமானாலும் வைக்கலாம். அடுத்த புரோகிராமினையும் இதே போல் ரெஸ்டோர் டவுண் செய்திட்டால் இந்த இரண்டு விண்டோக்களையும் சிறியதாக்கி திரையில் வைத்து டெஸ்க்டாப்பில் உள்ள ஐகான்களையும் இயக்கலாம். ஒன்றிலிருந்து டெக்ஸ்ட், படங்கள் மற்றும் பிற டேட்டாக்களை அப்படியே இழுத்து வந்து இன்னொன்றில் இடலாம். மிக எளிதாக இருக்கிறது அல்லவா? இந்த வசதியைப் பயன்படுத்தி பைல்களிடையே கூடு விட்டு கூடு பாய்ந்திடுங்கள்.

கம்ப்யூட்டர் பயன்பாட்டு குறிப்புகள்

சிறுவயதிலிருந்து நாம் எதனையாவது கற்றுக் கொள்கிறோம் என்றால் படம் பார்த்து விளக்கம் பெற்றுத்தான் அதனை மனதில் இறுத்திக் கொள்வோம். கம்ப்யூட்டர் பயன்பாட்டில் கற்றுக் கொள்ள எத்தனையோ இருக்கின்றன. அத்தனையும் ஒருவர் தன் வாழ்நாளில் கற்றுக் கொள்ள முடியாது.

எனவே அவரவருக்கு எந்த பிரிவில் உதவி தேவைப்படுகிறதோ அதனை மட்டும் தேடிப் பிடித்து கற்றுக் கொள்கிறோம். இணைய தளம் ஒன்றைத் தயாரிக்கிறீர்கள். டிஜிட்டல் போட்டோ எடுத்து அவற்றை கம்ப்யூட்டரில் இணைக்க முயற்சிக்கிறீர்கள்.

எடுத்த போட்டோக்களை எடிட் செய்திட விரும்புகிறீர்கள். இதற்கெல்லாம் உதவிக் குறிப்புகளை நாடுகிறீர்களா? அப்படியானால் உங்களுக்கென உள்ள இந்த தளம் குறித்து நீங்கள் கட்டாயம் அறிந்து கொள்ள வேண்டும்.

இத்தகைய உதவியினை வளமாக நல்ல டுட்டோரியல் பாடங்களாகப் பதிந்து வைத்து இந்த இணையதளம் தருகிறது. இதன் முகவரி http://www.goodtutorials.com/

13 பிரிவுகளாக இந்த வழிகாட்டும் தளங்கள் உள்ளன. அவை : CSS, Flash, HTML, Illustrator, Java, JavaScript, Maya, Photography, Photoshop, PHP, Ruby, Ruby on Rails and 3ds Max என பிரிக்கப்பட்டுள்ளன. முதல் பக்கத்தில் புதியதாக பதியப்பட்ட 15 உதவித் தளங்களின் பட்டியல் காணப்படுகிறது. நான் பார்த்த போது போட்டோ ஷாப்பிற்கான இன்டர்பேஸ் குறித்த டுடோரியல் காணப்பட்டது.

இதனைத் திறந்து பார்க்கையில் போட்டோ ஷாப் குறித்து பல செய்திகள் கிடைத்தன. இந்த உதவிக் கட்டுரைகளின் கீழாக மேலும் பல உதவி தரும் தளங்களுக்கான லிங்க்குகள் உள்ளன. அவற்றையும் கிளிக் செய்து படித்துத் தெரிந்து கொள்ளலாம். இதன் கீழ் சில பிரிவுகளும் உண்டு. அவை: Rating, Clicks, Comments, Save, Share and Report. இந்த தகவல்கள் குறித்த உங்கள் கருத்துக்களைத் தெரிவிக்கலாம்.

எந்த கட்டுரையை சேவ் செய்திட வேண்டுமென்றால் சேவ் டேபைத் தேர்ந்தெடுத்து சேவ் செய்திடலாம். அப்போது இன்னொரு லிங்க் தரப்பட்டு அங்கு சேவ் செய்யப்படும். உங்கள் அக்கவுண்ட்டில் இந்த கட்டுரைகள் சேவ் செய்யப்பட்டு இருக்கும். உங்கள் அக்கவுண்ட்டை ஏற்படுத்த இந்த தளத்தில் பதிவு செய்வதும் எளிது. நிச்சயமாய் இது உங்களுக்குப் பயனுள்ளதாக இருக்கும் என்பதால் இன்றே இந்த தளம் சென்று பதிந்து கொள்ளுங்கள். குறைந்த பட்சம் உங்கள் பேவரிட் தளப் பட்டியலில் இணைத்துக் கொள்ளுங்கள்.

இந்த செய்தியை எழுதும் போது இந்த தளத்தில் 25,049 டுடோரியல்கள் உள்ளதாக தெரிவிக்கப் பட்டுள்ளது.

நினைவூட்டும் இணைய தளம்

பரபரப்பான வாழ்க்கையில் சில முக்கிய நிகழ்ச்சிகளை நாம் மறந்து போகிறோம். அன்பானவர்களின் பிறந்த நாள், உற்ற தோழியின் திருமணம், வாங்கிய கடனுக்கு வங்கியில் பணம் செலுத்தும் நாள், கொடுத்த கடனுக்கு வட்டி வசூலிக்கும் நாள், வீட்டிற்கான வரிகள் செலுத்தும் நாள் என எத்தனையோ நாட்களை மறந்துவிட்டு பின் வருத்தப்படுகிறோம்.

உடன் இருப்பவர்களும் நமக்கு அதனை நினைவு படுத்த மறந்துவிடுகின்றனர். ஆனால் நாம் அன்றாடம் உறவாடும் கம்ப்யூட்டரும் இணையமும் இந்த பணியை நமக்குச் சரியாக மேற்கொண்டு நம்மை பல இக்கட்டுகளிலிருந்து பாதுகாக்கின்றன. இணையத்தில் உள்ள ஒரு தளம் நினைவுபடுத்தும் செயல்பாட்டினை மேற்கொள்கிறது.

இதன் பணிகளைப் பார்த்தால் நிச்சயம் இதனைப் பயன்படுத்திக் கொள்ள நீங்கள் முடிவு செய்வீர்கள். இந்த சேவை இலவசமாகக் கிடைக்கிறது என்பது இன்னும் மகிழ்ச்சிக்குரிய செய்தியாகும். http://www.remime.com/ என்பதே அந்த தளத்தின் முகவரி. இதில் லாக் ஆன் செய்து Sign Me Up என்ற பட்டனில் கிளிக் செய்திடவும். பின்னர் உங்கள் இமெயில் முகவரியை டைப் செய்து பாஸ்வேர்ட் ஒன்று உருவாக்கவும். முக்கியமாக எந்த நேர வளாகத்தில் (time zone) நீங்கள் உள்ளீர்கள் என்பதனைக் குறிப்பிடுவது முக்கியம்.

அங்கு தரப்பட்டிருக்கும் எழுத்துக்கள் அடங்கிய சொல்லை டைப் செய்து Create My Account என்ற இடத்தில் என்டர் தட்டவும். பின் ஓரிரு நிமிடங்களில் நீங்கள் கொடுத்த இமெயில் அக்கவுண்ட்டிற்கு தகவல் அனுப்பப்பட்டு உங்கள் பதிவு ஏற்றுக் கொள்ளப்படும். இனி மீண்டும் அந்த தளத்திற்குச் சென்று உள்ளே செல்லவும். உள்ளே நுழைந்தவுடன் அங்கு மூன்று டேப்கள் இருப்பதனைக் காணலாம். முதலாவதாக Home என்ற பிரிவு. இதில் பிறந்தநாள்கள், முக்கிய நிகழ்ச்சிகள் ஆகியவற்றைப் பதிந்து கொள்ள வசதி தரப்பட்டிருக்கும்.

இவற்றின் கீழேயே அடுத்து வர இருக்கும் நிகழ்ச்சிகளின் பட்டியல் மற்றும் உங்கள் அக்கவுண்ட்டிற்கான லிங்க்குகளைக் காணலாம். தானாகவே நீங்கள் அடுத்து வர இருக்கும் நிகழ்ச்சிகள் (Upcoming Events) பட்டியலில் இருப்பீர்கள். My Account என்ற பகுதியில் கிளிக் செய்தால் நீங்கள் ஏற்கனவே கொடுத்த தகவல்களை எடிட் செய்து மாற்றலாம். Birthdays என்ற பிரிவு மேலும் பல வகைகளாகப் பிரிக்கப்பட்டிருப்பதனைக் காணலாம்.

View All Birthdays, Add New Birthday, Import and Get Friend’s Birthday இதில் எனத் தரப்பட்டிருக்கும். Get Friend’s Birthday என்ற பிரிவின் மூலம் உங்கள் நண்பருக்கு இமெயில் மூலம் செய்தி அனுப்பி அவரின் பிறந்த நாளைக் காணலாம். Events என்ற பிரிவில் முக்கிய நிகழ்ச்சிகளைப் பதிந்து வைத்து அறிந்து கொள்ளலாம். புதிய நிகழ்ச்சிகளையும் சேர்க்கலாம். புதிய நிகழ்ச்சிகளைச் சேர்க்கையில் அது குறித்து ஒரு நினைவூட்டல் வேண்டுமா அல்லது அடுத்தடுத்து வேண்டுமா என்று குறிப்பிடலாம். இவ்வாறு தர வேண்டிய தகவல்களைத் தந்துவிட்டால் இந்த தளம் தானாக உங்களுக்கு அவ்வப்போது நீங்கள் செட் செய்ததற்கு ஏற்ப நினைவூட்டும் செய்திகளை அனுப்பிக் கொண்டே இருக்கும்.

எக்ஸ்புளோரர்-7 கூடுதல் வசதிகள்

இன்டர்நெட் எக்ஸ்புளோரர் தொகுப்பிற்கு போட்டியாக பயர்பாக்ஸ் மக்களிடையே பிரபலமானாலும் இன்னும் பெரும்பான்மை யானவர்கள் எக்ஸ்புளோரர் தொகுப்பையே பின்பற்றி வருகின்றனர். இதற்கான கூடுதல் வசதிகள் தரும் புரோகிராம் ஒன்று குறித்து இங்கே தகவல் தரப்படுகின்றன. இந்த புரோகிராம் IE 7 Pro என அழைக்கப்படுகிறது. இவை தரும் வசதிகளைப் பார்க்கையில் நிச்சயமாய் நாம் இதனைப் பயன்படுத்த வேண்டும் என்ற எண்ணம் ஏற்படுகிறது.

இந்த புரோகிராம் கீழ்க்காணும் வசதிகளை உங்களுக்குக் கூடுதலாய்த் தருகிறது. இன்டர்நெட்டில் உள்ள படிவங்களை சேவ் செய்தல், பைல்களை டவுண்லோட் செய்கையில் அச்செயலை நிர்வகித்தல், மவுஸ் மூலம் பிரவுசர் கண்ட்ரோல் செய்தல், ஸ்பெல்லிங் சரியா எனச் சோதித்தல், மேம்படுத்தப்பட்ட டேப் பயன்பாடு, ட்ராக் அண்ட் ட்ராப் புதுமை வசதி, உள்ளுக்குள்ளாக தேடுதல், வேகமான வெப் பிரவுசிங், கிராஷ் ஆனால் மீண்டெழுதல், விளம்பர தடை, பிளாஷ் தடை, இறுதியாக மூடிய தளத்தைத் திறத்தல், அட்ரஸ் பாரிலிருந்தே புதிய டேப் திறத்தல், இன்டர்நெட் எக்ஸ்புளோரர் மெனு பாரினை அட்ரஸ் பாருக்கு மேலே கொண்டு செல்லல் –– இப்படி பல வசதிகள் கிடைக்கின்றன. சொல்லிக் கொண்டே போனால் பல கூடுதல் விஷயங்களைச் சொல்ல வேண்டும். இதனை ஒரு முறை பயன்படுத்திப் பார்த்தால் பின் இந்த புரோகிராம் இன்றி இன்டர்நெட் எக்ஸ்புளோரரைப் பயன்படுத்த தயங்குவோம். http://www.download.com/IE7Pro/300012777_410649334.html?tag=pop.software&cdlPid=10844454 என்ற முகவரியில் உள்ள தளத்தில் இந்த புரோகிராமிற்கான பைல் கிடைக்கிறது. இதனை டவுண்லோட் செய்வதும் இன்ஸ்டால் செய்வதும் எளிது.

மேலே குறிப்பிட்ட வசதிகளில் சிலவற்றை இங்கு விளக்கமாக சொல்லியாக வேண்டும். மவுஸ் ஜெஸ்ச்சர் (Mouse gesture) என்பது மவுஸால் திரையில் ஒரு சில எளிய அடையாளங்களை எழுதி அமைப்பது. இந்த அடையாளங்கள் இன்டர்நெட் எக்ஸ்புளோரரை பல செயல்களை மேற்கொள்ளச் செய்கின்றன. டேப் ஒன்றைத் திறந்து மூடச் செய்கின்றன. முன்னால் மற்றும் பின்னால் உள்ள தளங்களுக்கு அழைத்துச் செல்கின்றன. அச்சிடுவதற்கான கட்டளை தருகிறது. இணையப் பக்கத்தை ஸ்குரோல் செய்து செல்ல உதவுகிறது. கிராஷ் ஏதேனும் ஏற்பட்டால் அடுத்த சரியான நிலைக்குக் கம்ப் யூட்டர் திறக்கப் படுகையில் முன்பு இருந்த அனைத்து தளங்களும் திறக்கப்படுகின்றன.

இணைய தளம் ஒன்றை அப்படியே படமாக சேவ் செய்திடலாம். பி.எம்.பி., ஜேபெக், ஜிப், பி.என்.ஜி. என பல பார்மட்டுகளில் இவற்றை சேவ் செய்திடலாம். இவற்றிற்கு மேலாக யு–ட்யூப் வீடியோவினை காப்பி செய்திடும் வசதியை ஐ.இ. 7 புரோ செய்கிறது. இன்ஸ்டால் செய்த பின் Scripts&Plugins module “User Scripts” என்ற பிரிவில் “Download Video from Youtube” என்பதில் டிக் அடையாளம் ஏற்படுத்தவும். இவ்வாறு ஏற்படுத்தியபின் பார்த்தால் யு–ட்யூப் தளத்தின் ஒவ்வொரு வீடியோ அருகிலும் “save as...” என்ற பிரிவு கிடைக்கும்.

இதில் கிளிக் செய்து வீடியோவினை டவுண்லோட் செய்து கொள்ளலாம். வீடியோ பைல் flv பைல் ஆக டவுண்லோட் செய்யப்படும். நீங்கள் இந்த பார்மட் பைலை இயக்கும் வீடியோ பிளேயரை இன்ஸ்டால் செய்து வீடியோவினைப் பார்க்கலாம். அல்லது வேறு பார்மட்டிற்கு மாற்றக் கூடிய புரோகிராமினை இன்ஸ்டால் செய்து பயன்படுத்த வேண்டும்.இது போன்ற குறிப்பிட்டுச் சொல்லக் கூடிய வசதிகள் பல உள்ளன. இந்த புரோகிராமினை இறக்கி இயக்கிப் பார்க்கவும்.

பிரிண்டர்களை எப்படி பராமரிப்பது?

பிரிண்டர்களைச் சரியாகப் பராமரிக்கா விட்டால் அவை அச்சடிக்கின்ற வகையில் பிரச்னை ஏற்படும். சில வேளைகளில் பிரிண்டர்கள் இயங்காமல் போகின்ற சந்தர்ப்பங்களும் ஏற்படுவதுண்டு. எந்த வழிகளில் இவற்றை அடிக்கடி கவனிக்க வேண்டும் என்பனை இங்கு பார்க்கலாம்.

முதலாவதாக இங்க் கார்ட்ரிட்ஜ்களை சுத்தமாகவும் புதியதாகவும் வைத்திருக்க வேண்டும். நீங்கள் அடிக்கடி பிரிண்டரைப் பயன்படுத்தாமல் வைத்திருந்தால் அதில் உள்ள கார்ட்ரிட்ஜில் வைக்கப்பட்டிருக்கும் மை உலர்ந்து போகும். உலர்ந்து போனால் அதனை பின் எந்த நிலையிலும் பயன்படுத்த முடியாது.

பின் புதிய கார்ட்ரிட்ஜ் தான் வாங்க வேண்டும். மை உலர்ந்து போன கார்ட்ரிட்ஜ் வாங்கிய பணம் வீண் தான்.எனவே இரு நாட்களுக்கு ஒரு முறை கருப்பு/வெள்ளை மற்றும் வண்ணங்கள் கலந்த அச்சில் அரை பக்கமாவது அச்செடுக்க வேண்டும்.

பல வேளைகளில் நாம் பிரிண்டரை மூடாமல் வைத்திருப்போம். அப்போது பிரிண்டரில் மேலாக மட்டுமின்றி உள்ளேயும் குறிப்பாக அச்சிடும் ஹெட் பகுதியில் தூசி படியும். இதனை அவ்வப்போது சரியான துணி கொண்டு சுத்தம் செய்து தூசி தொடர்ந்து படியாமல் பார்த்துக் கொள்ள வேண்டும். இதில் மிக கவனமாக செயல்பட வேண்டும். பிரிண்ட் ஹெட்டில் மிக மிக நுண்ணிய துளைகள் இருக்கும். இந்த துளைகள் வழியாகத்தான் கார்ட்ரிட்ஜ் மை அச்சிடும் டாகுமெண்ட்டிற்கேற்ப வெளிவந்து நமக்கு அச்சிட்ட படிவத்தைக் கொடுக்கிறது.

இந்த துளைகள் சில வேளைகளில் அதன் மீது உலர்ந்த மையினாலும் அடை படலாம். இதனை எவ்வாறு சுத்தம் செய்வது என நீங்கள் பிரிண்டர் வாங்கும்போது கொடுக்கப்பட்ட உதவிக் குறிப்பில் இருக்கும். அதனைப் பின்பற்றியே நீங்கள் ஹெட்டைச் சுத்தம் செய்திட வேண்டும். இங்க் கார்ட்ரிட்ஜிலேயே ஹெட் இருந்தால் பிரச்னை இல்லை; எடுத்து சுத்தம் செய்வது எளிதாகிவிடும். இல்லையேல் பிரிண்ட் ஹெட் இருக்கும் பகுதியில் அதற்கு செல்லும் வயர்களுக்கு எந்தவிதமான பாதிப்பும் இன்றி சுத்தம் செய்திட வேண்டும்.

பொதுவாக சுத்தமான (டிஸ்டில்டு) தண்ணீர் மற்றும் ஆல்கஹால் கொண்டு துணியை நனைத்து சுத்தம் செய்யலாம். தூசியை முதலில் சாதாரணமாகச் சுத்தம் செய்துவிட்டு பின் இந்த முறையைக் கையாள வேண்டும். மை உறைந்து ஹெட்டில் இருந்தால் இந்த முறையில் சரியாகிவிடும். உறைந்த மையைச் சரி செய்திட இன்னொரு வழியும் உண்டு. தொடர்ந்து பல பிரிண்ட்கள் எடுத்தால் உலர்ந்த மை பயன்படுத்தப்பட்டு ஹெட்டில் உள்ள துளைகளில் உள்ள அடைப்புகள் நீக்கப்படலாம்.

ஆனால் எத்தனை பிரிண்ட் இவ்வாறு எடுக்கப்பட வேண்டும் என்பது உலர்ந்த தன்மையைப் பொறுத்தது. சில வேளைகளில் 10 முதல் 15 முறை பிரிண்ட் எடுக்க வேண்டும். இது வீண்தான். ஆனால் வேறு வழியில்லை. மொத்தமாகக் கீழே வீணாய்ப் போட்டு பணம் போவதைக் காட்டிலும் சில பிரிண்ட்கள் வீணாக எடுப்பதில் தவறில்லை. பிரிண்ட் ஹெட்களை மட்டும் தனியே கழற்றி எடுக்கும் வகையில் பிரிண்டர் வடிவமைக்கப் பட்டிருந்தால் அதனைத் தனியே பிரித்து ஆல்கஹால் அல்லது நீர்த்த அம்மோனியா திரவத்தில் சில நிமிடங்கள் ஊற வைத்து சுத்தம் செய்யலாம். இதனை விஷயம் தெரிந்த ஒருவரைக் கொண்டு மேற்கொள்வதே நல்லது.

ரன் கமாண்டில் புரோகிராம்கள்

நாம் பயன்படுத்தும் அனைத்து புரோகிராம்களுக்கும் மானிட்டர் திரையில் ஷார்ட் கட் ஐகான்களை ஏற்படுத்த முடியாது. பின் ஏதேனும் ஒன்றைத் தேடுவது சிரமமாகிவிடும். புரோகிராம்கள் வேண்டும் என்றால் ஸ்டார் பட்டன் அழுத்தி பின் புரோகிராம் கிளிக் செய்து பின் வரும் நீண்ட மெனுவில் தேடும் புரோகிராம் உள்ள போல்டரைத் திறந்து குறிப்பிட்ட புரோகிராம் பெயரில் கிளிக் செய்வதும் சிரமமே. எடுத்துக் காட்டாக உங்களுக்கு கால்குலேட்டர் தேவையாய் உள்ளது. ஸ்டார்ட் –– புரோகிராம் –– அக்சசரீஸ் – கால்குலேட்டர் என வரிசையாகச் செல்வது எரிச்சல் படுத்தும் வேலைதான்.

இதற்கு ஒரு சிறந்த வழி உள்ளது. நாம் பயன்படுத்தும் பெரும்பான்மையான புரோகிராம்களை ரன் கமாண்ட் மூலம் பெறலாம். ஸ்டார்ட் கிளிக் செய்து ரன் விண்டோவில் கட்டளையை டைப் செய்வதன் மூலம் பெரும்பான்மையான புரோகிராம்களைப் பெறலாம். அவற்றில் சில இங்கு தரப்பட்டுள்ளது.

calc — கால்குலேட்டர், charmap – கேரக்டர் மேப்
clipbrd – விண்டோஸ் கிளிப் போர்ட்
control– கண்ட்ரோல் பேனல்
acrobat அடோப் அக்ரோபட் ரீடர்
photoshop அடோப் போட்டோ ஷாப்
firefox பயர்பாக்ஸ் பிரவுசர்
fonts – பாண்ட்ஸ் போல்டர்
freecell பிரீசெல் கார்ட் கேம்
iexplore இன்டர்நெட் எக்ஸ்புளோரர்
control keyboard கீ போர்டு புராபர்ட்டீஸ்
excel – எம்.எஸ். எக்ஸெல்
mspaint / pbrush – பெயிண்ட் புரோகிராம்
powerpnt பவர்பாயிண்ட் புரோகிராம்
winword – எம்.எஸ். வேர்ட் தொகுப்பு
notepad – நோட்பேட்
osk – ஆன்ஸ்கிரீன் கீபோர்ட்
realplay – ரியல்பிளேயர்
regedit32 / regedit – ரெஜிஸ்ட்ரி எடிட்டர்
shutdown– ஷட் டவுண் விண்டோஸ்
msinfo32–msinfo32– சிஸ்டம் இன்பர்மேஷன்

இது போல பல கட்டளைகளை ரன் விண்டோவில் கொடுத்து புரோகிராம்களை இயக்கலாம். ஆனால் இந்த புரோகிராம்கள் கம்ப்யூட்டரில் பதிந்து வைக்கப்பட்டிருக்க வேண்டும்.

எக்ஸெல் டேட்டாவில் மதிப்பை கூட்ட!

எக்ஸெல் தொகுப்பில் சில ஒர்க் ஷீட்களில் பொதுவான ஒரு மதிப்பை வைத்துக் கொண்டு அவற்றை மற்ற செல்களில் பயன்படுத்தும் வகையில் அமைத்திருப்போம். வெவ்வேறு செல்களில் அந்த மதிப்பினை அவற்றில் உள்ள பிற மதிப்புடன் கூட்டவோ, பெருக்கவோ அல்லது வகுக்கவோ வேண்டியதிருக்கும். அப்போது ஒவ்வொரு செல்லாக இந்த மதிப்பினைக் கொண்ட டேட்டாவை அமைத்து இயக்க அதிக நேரம் பிடிக்கும். இதற்கு ஒரு சுருக்க குறுக்கு வழியினை எக்ஸெல் தருகிறது.

அதன்பின் இந்த மதிப்பினை எந்த செல்களில் எல்லாம் பயன்படுத்த வேண்டும் என திட்டமிடுகிறீர்களோ அதனை கண்ட்ரோல் அழுத்தியவாறே தேர்ந்தெடுக்கவும். பின் Edit மெனுவில் Paste Special பங்ஷனைத் தேர்ந்தெடுக்கவும். அந்த டயலாக் பாக்ஸில் Operation என்று ஒருபிரிவு இருக்கும். இதில் இந்த வேல்யூவை கூட்டவேண்டுமா அல்லது வேறு வகைகளில் செயல்படுத்த வேண்டுமா எனக் கேட்டு அனைத்து ஆப்ஷன்களும் தரப்பட்டிருக்கும்.

இதனைத் தேர்ந்தெடுத்து ஓகே கிளிக் செய்தால் நீங்கள் திட்டமிட்டபடி தேர்ந்தெடுத்த செல்களில் மாற்றங்களைக் காணலாம். இதில் இன்னொரு மாற்றத்தையும் நீங்கள் எதிர்பாராத வகையில் மேற்கொள்ளப் படுவதனைக் காணலாம். இந்த செல்களில் ஏற்கனவே சில பார்மட்டிங் வழிகளை மேற்கொண்டிருந்தால் அவை மறைந்திருக்கும். கவலைப்பட வேண்டாம். அப்படிப்பட்ட செல்களில் மாற்றங்களை மேற்கொள்வதாக இருந்தால் Paste Special டயலாக் பாக்ஸில்முதல் பகுதியில் Values என்று ஒரு பிரிவு இருக்கும். அதனை முதலில் தேர்ந்தெடுத்துவிட்டு பின் கணக்கிடுவதற்கான தேர்வுகளைத் தேர்ந்தெடுத்து பின் ஓகே கிளிக் செய்திடவும்.

வேர்டில் எளிதான ரிபீட் படங்கள்

வேர்டில் டாகுமெண்ட் ஒன்றைத் தயாரித்துக் கொண்டிருக்கிறீர்கள். ஒரு முறை பிரேக் கொடுத்து நீங்கள் தொடர்ந்து அடித்த டெக்ஸ்ட் அனைத்தையும் மீண்டும் அமைக்க வேண்டியுள்ளது. என்ன செய்வீர்கள்? வேர்டுக்குப் புதிது என்றால் மீண்டும் அனைத்தையும் டைப் செய்வீர்கள்.

சிறிது பழக்கப்பட்டவர் என்றால் தேவைப்பட்ட டெக்ஸ்ட்டை செலக்ட் செய்து பின் காப்பி செய்து அதன்பின் குறிப்பிட்ட இடத்தில் பேஸ்ட் செய்வீர்கள். அதற்குப் பதிலாக நீங்கள் இறுதியாக டைப் செய்த டெக்ஸ்ட் தொடரை அப்படியே பேஸ்ட் செய்திட ஷார்ட் கட் கீ தொகுப்பு இருந்தால் எவ்வளவு நன்றாக இருக்கும்.

இருக்கிறது. ஜஸ்ட், Ctrl + Y அழுத்துங்கள். எந்த இடத்தில் டெக்ஸ்ட்டை இடைச் செருகல் செய்திட வேண்டுமோ அந்த இடத்தில் வைத்து இந்த இரு கீகளையும் அழுத்தினால் உடனே அந்த டெக்ஸ்ட் பேஸ்ட் ஆகும்.

ஒரிஜினல் அதே இடத்தில் அப்படியே: எம்.எஸ். வேர்ட், எக்ஸெல் அல்லது பவர்பாய்ண்ட் பைல்களைக் கையாள்கையில் சில வேளைகளில் பைல் ஒன்றில் மாற்றங்களை ஏற்படுத்துவீர்கள். உங்கள் நோக்கம் பழைய பைலை அப்படியே வைத்துக் கொண்டு மாற்றங்களுடனான புதிய பைல் வடிவத்தினை புதிய பெயரில் வைத்திட வேண்டும் என்பது. ஆனால் ஏதோ எண்ணத்தில் மாற்றங்களை ஏற்படுத்திக் கொண்டிருக்கையில் சேவ் அஸ் செல்லாமல் கண்ட்ரோல் + எஸ் கீகளை அழுத்தி ஒரிஜினல் பைலை மாற்றங்களுடன் சேவ் செய்து ஒரிஜினல் பைலை கோட்டை விட்டுவிடுவீர்கள்.

இதற்கு தவறே ஏற்படுத்த முடியாத ஒரு வழி ஒன்று உள்ளது. File மெனு திறந்து Open பிரிவு செல்லுங்கள். இந்த விண்டோவில் நீங்கள் பயன்படுத்த விரும்பும் பைலைத் தேடுங்கள். பைலைக் கண்டுபிடித்தவுடன் Open பட்டனை அழுத்தும் முன் சற்று தாமதப்படுத்துங்கள். எப்போதாவது அந்த பட்டனில் கீழ் நோக்கி ஒரு அம்புக் குறி இருப்பதனைப் பார்த்திருக்கிறீர்களா? நிச்சயம் பார்த்திருக்க மாட்டீர்கள்.

இப்போது பாருங்கள். இது போன்ற அம்புக் குறி இருப்பது எதனைக் குறிக்கிறது? சம்பந்தப்பட்ட பட்டனுக்கு இன்னும் சில சாய்ஸ் இருப்பதனைக் காட்டுகிறது. இப்போது அந்த அம்புக் குறியினை கிளிக் செய்திடுங்கள். ஒரு சிறிய மெனு விரியும். அதில் “Open as Copy” என்ற பிரிவைத் தேர்ந்தெடுங்கள். உங்கள் புரோகிராம் நீங்கள் தேர்ந்தெடுத்த பைலின் காப்பி ஒன்றைத் தேர்ந்தெடுக்கும். இந்த பைலில் நீங்கள் மேற்கொள்ள விரும்பும் எடிட் வேலைகளை மேற்கொள்ளுங்கள். உங்கள் ஒரிஜினல் பைல் அப்படியே இந்த மாற்றங்கள் இன்றி இருக்கும்.

எக்ஸெல் டிப்ஸ்!

எக்ஸெல் ஒர்க் ஷீட்டில் மவுஸின் ஸ்குரோல் வீலைப் பயன்படுத்தி கீழாக பல வரிசைகளைத் தாண்டி வந்துவிட்டீர்கள். நீங்கள் முதலில் பார்த்துக் கொண்டிருந்த வரிசைகளெல்லாம் உங்கள் பார்வையிலிருந்து மறந்துவிட்டன. அப்போது ஒரு ஆரோ கீயை அழுத்துகிறீர்கள். என்ன நடக்கிறது? நீங்கள் முதலில் எங்கு இருந்தீர்களோ அங்கு இருந்த செல்லுக்கு அருகே இருக்கிறீர்கள்.

இங்கு என்ன நடக்கிறது? முதலில் ஸ்குரோல் வீலைச் சுழற்றுகையில் கண் முன் இருந்த செல்களெல்லாம் காணாமல் போய் நூறு வரிசை தாண்டி எங்கோ போகிறீர்கள். பின் எப்படி முன்பு இருந்த இடத்திற்கு வருகிறீர்கள்? அதிர்ச்சி அடையாதீர்கள். இங்கு எதுவும் உங்கள் கண் பார்வையில் இருந்து மறைந்துவிடவில்லை.

அல்லது கண்களுக்கு மாயத் தோற்றம் எதுவும் தோன்றவில்லை. ஸ்குரோல் பார் அல்லது மவுஸ் வீல் கொண்டு ஸ்குரோல் செய்திடுகையில் நீங்கள் புதிய செல் எதனையும் தேர்ந்தெடுக்கவில்லை. ஸ்கிரீனில் உள்ள தோற்றம் தான் மாறுகிறது. இதனால் தான் நீங்கள் ஆரோ கீயை அழுத்தியவுடன் முன்பு எங்கிருந்தீர்களோ அந்த வரிசைக்கு அருகேயுள்ள வரிசையில் கர்சருடன் இருக்கிறீர்கள். இதில் நமக்கு ஒரு அனுகூலம் உள்ளது. நாம் செயலாற்றும் செல் அருகே இருந்து கொண்டு ஒர்க் ஷீட் முழுவதும் ஒரு பயணம் செய்து எது எங்கே இருக்கிறது என்று அறிந்து கொண்டு மீண்டும் இருந்த இடத்திற்கே வரலாம்.

ஒரே நேரத்தில் பல செல்களில் டேட்டா: எக்ஸெல் ஒர்க் ஷீட்டில் சில வேளைகளில் ஒரே டேட்டாவினை சில குறிப்பிட்ட செல்களில் அமைக்க வேண்டியதிருக்கும். அப்போது என்ன செய்கிறோம். பெரும்பாலானோர் ஒரு செல்லில் டேட்டாவை டைப் செய்து விட்டு பின் அதனை காப்பி செய்து அதன்பிறகு எந்த எந்த செல்களில் எல்லாம் பேஸ்ட் செய்திட வேண்டுமோ அந்த செல்களில் பேஸ்ட் செய்வார்கள். இது சிரமம் தரும் செயல்தான். ஆனால் வேறு வழி? இருக்கிறது. எக்ஸெல் அதற்கான மிக மிக எளிய வழி ஒன்றை வைத்துள்ளது. முதலில் எந்த எந்த செல்களில் எல்லாம் குறிப்பிட்ட ஒரே டேட்டாவை அமைக்க வேண்டுமோ அதனை எல்லாம் தேர்ந்தெடுக்கவும்.

இந்த செல்கள் எல்லாம் அடுத்தடுத்து இல்லாமல் இருக்கலாம். எனவே இவற்றைத் தேர்ந்தெடுக்கையில் கண்ட்ரோல் கீயினை அழுத்தியவாறு தேர்ந்தெடுக்கவும். அனைத்தும் தேர்ந்தெடுத்த பின் இப்போது டேட்டாவை டைப் செய்தாக வேண்டும் அல்லவா? அவசரப்பட வேண்டாம். என்டர் கீ அழுத்த வேண்டாம். டேட்டாவை ஏதேனும் ஒரு செல்லில் டைப் செய்துவிடுங்கள். பின்னர் கண்ட்ரோல் கீயை அழுத்திக் கொண்டு என்டர் தட்டுங்கள். ஆஹா! தேர்ந்தெடுத்த செல்களில் எல்லாம் டேட்டா டைப் ஆகிவிட்டதே என்று ஆச்சரியப்படுகிறீர்களா! கம்ப்யூட்டர் என்றைக்குமே நம் வேலையை எளிதாக்கும் சாதனம்தான்.

செல்லின் அகலம்: எக்ஸெல் ஒர்க் ஷீட்டில் பணியாற்றுகையில் செல் ஒன்றின் அகலத்தை கூட்டுவதும் குறைப்பதுவுமாக இருப்போம், இல்லையா? சில நேரங்களில் செல் ஒன்றின் அகலத்திலேயே இன்னொரு செல்லை அமைக்க முயற்சி செய்வோம். இதற்கு எக்ஸெல் மெனுக்கள் ஒரு வழியும் கொண்டுள்ளன. Format மெனு சென்று அதில் Column என்ற மெனுவினைப் பெற்று அதில் Width என்ற பிரிவில் Column த்திற்குத் தேவைப்படும் அகலத்தினை அமைப்போம். ஆனால் குறிப்பிட்ட Column எந்த அகலத்தில் இருக்க வேண்டும் என நாம் முன்பே முடிவு செய்திருக்க வேண்டுமே; அதனை எப்படி முடிவு செய்வது? இதற்கான வழி Column ஒன்றின் அகலத்தை மட்டும் காப்பி செய்து அதனை இன்னொரு செல் மீது அமைப்பது. அது எப்படி அகலத்தை மட்டும் காப்பி செய்வது? என்ற வியப்பு வருகிறதா! இதோ பார்ப்போம்.

முதலில் நீங்கள் விரும்பும் அகலத்தில் உள்ள செல்லைத் தேர்ந்தெடுங்கள். இதனை காப்பி செய்திடுங்கள். இதற்கான வழிகள்: Copy பட்டன் அழுத்துவது / Ctrl + C கீகளைப் பயன்படுத்துவது / Edit மெனு சென்று அதில் Copy பிரிவில் கிளிக் செய்வது எனப் பல வழிகள் உள்ளன. இதில் உங்களுக்குப் பிரியமான வழியில் காப்பி செய்திடவும். இனி அடுத்த படியாக இந்த அகலத்தில் இருக்க வேண்டிய Column ஐத் தேர்ந்தெடுக்கவும். அடுத்தபடியாக Paste Special என்ற பிரிவிற்குச் செல்ல வேண்டும். இது எங்கு உள்ளது? Edit மெனு சென்றால் இந்த பிரிவினைப் பார்க்கலாம். இதனைத் தேர்ந்தெடுத்தவுடன் Paste Special விண்டோ உங்களுக்குக் கிடைக்கும். Column Width என்ற பிரிவினைக் கண்டறியவும். இதனைத் தேர்ந்தெடுத்து ஜஸ்ட் ஓகே கிளிக் செய்திடவும். மேஜிக் நடந்தது போல எந்த டேட்டா மற்றும் பார்மட்டிங் எதுவும் மாறாமல் அகலம் மட்டும் மாறி அந்த இணிடூதட்ண மாற்றப்படுவதனைக் காணலாம்.

இழுத்துச் சென்றால் புதிய ஒர்க்புக்: நல்ல கட்டமைப்பில் ஓர் ஒர்க்ஷீட்டினை அமைத்துவிட்டால் அதனையே அடிப்படையாக வைத்து மற்ற ஒர்க்ஷீட்டுகளையும் அமைக்க விரும்புவோம். அதற்காக அந்த ஒர்க்ஷீட்டை அப்படியே காப்பி செய்திடுவோம். சில நேரங்களில் வேறு பயன் பாட்டிற்காகவும் ஒர்க் புக்கினை காப்பி செய்திட வேண்டியதிருக்கும். இதற்காக நிறைய காப்பி அண்ட் பேஸ்ட் மேற்கொள்ள வேண்டியதிருக்கும். இது சற்று களைப்பான சமாச்சாரமாகத் தெரிகிறதா? இதற்குப் பதிலாக இந்த ஒர்க்ஷீட்டிற்கான டேப்பினை இழுத்துச் சென்று விட்டு அந்த இடத்தில் புதிய ஒர்க்புக்கினை அமைப்பது எவ்வளவு எளிதானது. ஆம், எக்ஸெல் அந்த வசதியினைத் தருகிறது.

முதலில் எந்த ஒர்க்புக் கிலிருந்து காப்பி செய்திட வேண்டுமோ அந்த ஒர்க்புக்கி னைத் திறந்து கொள்ளுங்கள். முதலில் இதனை ரெஸ்டோர் செய்திட வேண்டும். அதாவது அப்படியே காப்பி செய்வதற்குத் தயார் படுத்த வேண்டும். இதற்கு முதலில் Ctrl + F5 அழுத்துங்கள். இனி எந்த ஒர்க்ஷீட்டினை காப்பி செய்திட வேண்டுமோ அதன் டேபை மவுஸின் கர்சரைப் பிடித்து இழுக்கவும். ஒர்க் புக்கைச் சுற்றி கிரே ஸ்பேஸ் இருக்கும் அல்லவா? அதில் எங்கேனும் விட்டுவிடவும். மவுஸின் முனையை விட்டவுடன் அந்த ஒர்க் ஷீட்டுடன் புதிய ஒர்க்புக் உண்டாக்கப்படும். பழைய ஒர்க்புக் அப்படியேதான் இருக்கும். இதனை வேறு பெயரில் சேவ் செய்து பயன்படுத்தலாம். இன்னும் சில ஒர்க்ஷீட்டுகளை இதில் இணைக்க வேண்டும் என விரும்பினாலும் இணைக்கலாம்.
ஒவ்வொரு வரிசையாகக் காப்பி செய்து பேஸ்ட் செய்வதைக் காட்டிலும் இது எவ்வளவு எளிதானது என்று பார்த்தீர்களா!

எக்ஸெல் தொகுப்பில் ஆட்டோசேவ்: எக்ஸெல் தொகுப்பில் உருவாக்கப்படும் பைல்களைத் தாமாக சேவ் செய்திடும் அரிய வசதி ஒன்று உள்ளது. பலர் இதனை செட் செய்து இதன் பயனை அனுபவிக்காமலேயே இருக்கின்றனர். குறிப்பிட்ட கால அவகாசத்தில் தானாகவே செயல்படும் பைல்கள் அதுவரை மேற்கொண்ட தகவல்களுடன் சேவ் செய்யப்படும். இதன் டிபால்ட்(Default) செட்டிங்ஸ் பத்து நிமிடங்களாகும். எனவே புரோகிராமிற்கு ஏதாவது ஏற்பட்டு கிராஷ் ஆனால் நீங்களாக சேவ் செய்யாதபோது உங்களுடைய ஒன்பது நிமிட வேலை வீணாகிவிடும். எனவே ஆட்டோ சேவ் எனச் சொல்லப்படும் இந்த செயல்பாட்டின் நேரத்தைச் சுருக்கமாக சிறிய கால அவகாசமாக செட் செய்திடலாம். மேலும் இந்த பைலுக்கான பேக்கப் பைலை உருவாக்கும் படியும் செட் செய்திடலாம்.

இதற்கு Tools மெனு கிளிக் செய்து அதில் வரும் மெனுவில் Options என்ற பிரிவைத் தேர்ந்தெடுக்கவும். பின் கிடைக்கும் டயலாக் பாக்ஸில் Save என்ற டேபில் கிளிக் செய்தால் வரும் சிறிய விண்டோவில் Save Auto recover in every என்று ஒரு வரியும் அதன் அருகே நிமிடங்களை செட் செய்திட எண்ணுடன் மேல் கீழ் அம்புக் குறிகளும் கிடைக் கும். இதில் 10 என்று இருப்பதை மாற்றுங்கள். எத்தனை நிமிடங்களுக்கு ஒருமுறை தகவல்களை சேவ் செய்திட எண்ணுகிறீர்களோ அந்த எண்ணை அமைக் கவும். பின் அதன் கீழாக Auto recover save location என்று ஒரு வரியின் எதிரே எங்கு இந்த பைல் சேவ் செய்யப் பட வேண்டும் என்பதனை காட்டும் கட்டம் இருக்கும். இங்கு நீங்கள் விரும்பும் இடத்தில் பைலை சேவ் செய்திடும் வகையில் மாற்றலாம். பின் ஓகே கொடுத்து வெளியேறவும்.

எக்ஸெல் ஒர்க் ஷீட்டில் ஏன் இந்த அடையாளம்?

எக்ஸெல் ஒர்க் ஷீட்டில் திடீரென ஒரு நெட்டு வரிசை முழுவதும் XXXX எனக் காணப்படும். இது எதனைக் குறிக்கிறது? ஏன் இந்த அடையாளம் வருகிறது. சிறிது எண்ணிப் பார்க்க வேண்டிய விஷயம். நாம் தெளிவாக டேட்டாவினைத் தந்துள்ளோம். ஆனால் தேவையற்ற வகையில் சம்பந்தமில்லால் ஏன் இந்த அடையாளம் வருகிறது? எண்கள் இருக்க வேண்டிய செல்லில் ஏன் இந்த நான்கு குறியீடுகள் வருகின்றன? வேறு ஒன்றும் இல்லை. செல்லின் அகலத்தை மீறி நீங்கள் எண்களைத் தந்திருக்கிறீர்கள். அகலம் போதாததால் இந்த அடையாளம் காட்டப்படுகிறது. அடையாளம் நீங்கி எண்கள் வரவேண்டும் என்றால் என்ன செய்திட வேண்டும்? செல்லின் அகலத்தைச் சற்று அதிகப்படுத்த வேண்டும். அவ்வளவு தான். நீங்கள் எதிர்பார்க்கும் எண்கள் அங்கு இடம் பெறும்.

சில நேரங்களில் 2E+15 என்ற அடையாளம் இடம் பெற்றிருக்கும். இதன் பொருள் என்ன? ஒன்றுமில்லை; உங்கள் எண் சயின்டிபிக் நொட்டேஷனில் தரப்பட்டுள்ளது. இது எப்போது ஏன் ஏற்படுகிறது. அந்த செல்லின் பார்மட் ஜெனரலாக இருந்து நீங்கள் கொடுக்கும் எண் மிக நீளமானதாக இருந்தால் இந்த மாதிரி சயின்டிபிக் நொட்டேஷன் கொடுக்கும் வகையில் எக்செல் வடிவமை க்கப்பட்டுள்ளது. இங்கும் செல்லின் அகலத்தை நீட்டி விட்டால் பிரச்னை தோன் றாது. எப்படி செல்லின் அகலத்தை நீட்டுவது? மவுஸ் பாய்ண்ட்டரை இரண்டு செல்கள் பிரிக்கும் இடத்தில் கொண்டு செல்லுங்கள். அது இரண்டு சைட் அம்புக்குறியாக மாறும். உடனே இடது மவுஸ் பட்டனைக் கிளிக் செய்து அழுத்திப் பிடித்துக் கொள்ளுங்கள்.

இனி அப்படியே மவுஸை வலது பக்கம் சிறிது சிறிதாக இழுங்கள். தானாக செல் அகலம் அதிகரிக்கப்படும். இதற்குப் பதிலாக டயலாக் பாக்ஸ் திறந்தும் AutoFit கட்டளை கொடுக்கலாம்.முதலில் Format மெனு செல்லுங்கள். அதில் Column துணை மெனு தேர்ந்தெடுங்கள். இதில் Width பிரிவில் Autofit Selection என ஒரு பிரிவு இருக்கும். இதனைத் தேர்ந்தெடுத்து ஓகே கிளிக் செய்து வெளியேறினால் நெட்டு வரிசை டேட்டாவிற்கேற்றபடி தானாக பெரிதாகி அட்ஜஸ்ட் செய்து கொள்ளும்.

பவர்பாய்ண்ட் பிரசன்டேஷனில் ஹெடர் புட்டர்

அழகான ஸ்லைடுகளைக் கொண்டு அருமையான ஒரு பவர்பாய்ண்ட் பிரசன்டேஷனை அமைக்கிறீர்கள். இதில் சில குறிப்புகள் ஒவ்வொரு ஸ்லைடிலும் வர வேண்டும் என திட்டமிடுகிறீர்கள். எடுத்துக் காட்டாக பிரசன்டேஷன் யாருக்காக யாரால் தரப்படுகிறது என்ற தகவல்; அல்லது நாள், குறிப்புகள் என இவை பலவகைப்படும். இவற்றை டாகுமெண்ட்டுகளில் இணைப்பது போல ஹெடர் புட்டர்களில் அமைக்கலாம்.

ஆம், பிரசன்டேஷன் ஸ்லைடுகளிலும் இவற்றை அமைக்கலாம். இதற்கு முதலில் View மெனுவிலிருந்து “Header and Footer” என்ற ஆப்ஷனைத் தேர்ந்தெடுக்கவும்.

ஒரு சிறிய டயலாக் பாக்ஸ் “Header and Footer” என்ற தலைப்பில் திறக்கப்படும். இதில் உள்ள டேப்களில் “Slide” என்பதனைத் தேர்ந்தெடுக்கவும். தேதி மற்றும் நேரத்தை இங்கு அமைப்பதாக வைத்துக் கொள்வோம். இதில் “Fixed” மற்றும் “Date and time” என்பதைத் தேர்ந்தெடுக்கவும். இதில் “Include on slide” என்ற பிரிவில் Update automatically Date and time என்பதனைத் தேர்ந்தெடுக்கவும்.

ஸ்லைட்களுக்கு எண்களைச் சேர்ப்பதாக இருந்தால் “Slide number” என்ற ஆப்ஷனைத் தேர்ந்தெடுக்கவும்.புட்டரில் ஏதேனும் சேர்ப்பதாக இருந்தால் Footer செக்பாக்ஸைத் தேர்ந்தெடுத்து ஸ்லைட் புட்டரில் என்ன இருக்க வேண்டும் எனத் திட்டமிடுகிறீர்களோ அதனை டைப் செய்திடவும். பின் Apply பட்டனைக் கிளிக் செய்து வெளியேறவும். “Notes and Handouts” என்ற டேப் அழுத்திக் கிடைக்கும் விண்டோவில் இங்கு “Header” என்பதைத் தேர்ந்தெடுக்கலாம். இங்கும் “Date and time” அமைக்கலாம். புட்டர் ஆப்ஷன்களையும் அமைக்கலாம். அனைத்தும் தேர்ந்தெடுக்கப்பட்ட பின் “Apply to All” என்பதனைக் கிளிக் செய்து ஓகே அழுத்தி வெளியேறவும்.

சிடிக்களை கையாளும் முறை!

கம்ப்யூட்டரைப் பயன்படுத்தும் ஒருவருக்கு விதம் விதமாக புதிய கோணங்களில் இருந்தெல்லாம் பிரச்னைகள் வரும். அதில் ஒன்று டிரைவிலிருந்து சிடி வெளியே வராமல் இருப்பது. வேலையை முடித்து டேட்டாவை சிடியில் எழுதி பின் சிடியை வெளியே எடுத்து அடுத்த பணிக்குச் செல்லலாம் என்று திட்டமிடுகையில் சிடி வெளியே வரவில்லை என்றால் நமக்கு வரும் கோபம், எரிச்சல் நிச்சயம் நம்மையே அழித்துவிடும். எனவே இந்த சூழ்நிலையில் என்ன செய்யலாம்? ஏன் இந்நிலை ஏற்படுகிறது என்று பார்ப்போம்.

1. முதலில் இன்னொரு பைலை அந்த சிடியில் எழுதிப் பாருங்கள். ஏற்கனவே எழுதிய பைல் பார்மட்டில் இல்லாமல் வேறு வகை பார்மட்டில் எழுதிய பைலை காப்பி செய்து பாருங்கள். காப்பி ஆனவுடன் வெளியே வரலாம்.

2. எப்போதும் சிடி ஒன்றை டிரைவில் போட்டு அதிலிருந்து பைலைப் படிக்கும் வேலை அல்லது எழுதும் வேலை முடிந்துவிட்டதா? உடனே அதனை எடுத்துவிடுங்கள். வேறொரு புரோகிராமினைத் திறந்து செயல்பட முனையும் போது அதனால் சிக்கல் ஏற்பட்டு அது சிடியைச் சிக்க வைக்கலாம். அது போலவே சிடி எழுதுவதற்கான நீரோ போன்ற புரோகிராம்களில் சிடியில் எழுதி முடித்தவுடன் சிடியை வெளியே தள்ளும் வகையில் செட் செய்திட வசதி இருக்கும். அவ்வாறே செட் செய்வது நல்லது.

3. வர மறுக்கும் சிடியை எடுக்க இன்னொரு சிறந்த வழி கம்ப்யூட்டரை ரீ பூட் செய்வதாகும். இதனால் சிடி வெளியே வரும் வாய்ப்புண்டு.

4. மை கம்ப்யூட்டரை கிளிக் செய்து அதில் கிடைக்கும் விண்டோவில் சிடி டிரைவிற்கான இடத்தில் ரைட் கிளிக் செய்து அதில் Eject என்பதில் கிளிக் செய்து பார்க்கலாம். இதில் ஒரு முறை கிளிக் செய்தால் மட்டும் போதாது. பல முறை கிளிக் செய்தால் ஏற்படும் கட்டளைத் திணிப்பில் டிரைவ் வெளியே வரலாம்.

5. இத்தனை வழிகளையும் கையாண்டு வெளியே வரவில்லை என்றால் இறுதியாக நம் பலத்தை பிரயோகிக்க வேண்டியதுதான். அது ஒன்றுமில்லை; ஒரு சிறிய பேப்பர் கிளிப் என்ற ஜெம் கிளிப்பைப் பிரித்து நீட்டி டிரைவின் கதவில் தெரியும் சிறிய துவாரத்தில் மெதுவாகச் செருகவும். ஒரு இடத்தில் எதிராக ஒரு சிறிய தடுப்பில் நிற்கும். அதனை மெதுவாக அழுத்தினால் கதவு திறக்கப்படும். பின் சிடியை எடுத்துவிடலாம்.

6. சிடியைச் சரியாக அதன் டிரைவில் பொருத்தவில்லை என்றால் அது உள்ளே செல்லாமல் மீண்டும் மீண்டும் அதன் கதவு திறக்கப்படும். நாம் டிரைவின் கதவு மூடப்படுவதில்தான் பிரச்னை என்று முடிவு செய்து பலத்தைப் பயன்படுத்தி கதவை மூடக் கூடாது. பொறுமையாக என்ன பிரச்னை என்று ஆய்வு செய்திட வேண்டும். அதன் முதலாவது செயல்தான் சிடியைச் சரியாக அதன் இடத்தில் வைப்பது. சிறிய அளவில் அது சரியாக இல்லை என்றால் அதன் உள்ளாக மோட்டார் ஸ்டெம் உட்காருகையில் அது தானே சரி செய்யப்படும். அப்படி சரி செய்திட முடியாத பட்சத்தில் சிடி டிரைவின் செயல்பாட்டில் மாறுதல் ஏற்படும். சரியாக இயங்காது. இதைப் போன்ற சூழ்நிலைகளில் சிடிக்கள் சில நொறுங்கிப் போன நிகழ்வுகளும் நடந்தது உண்டு.

7.எனவே ஒரு சிடி டிரைவ் சரியாக இயங்கவில்லை என்றால் நாம் அதனைப் பயன்படுத்தும் முறைதான் சரியில்லை என்று பொருள். எனவே கம்ப்யூட்டரின் மீது கோபப்படுவதனை விட்டுவிட்டு மீண்டும் மீண்டும் அதனைச் சரியாக இயக்க முயற்சிக்க வேண்டும்.

8. சில வேளைகளில் வேறு எங்கோ பார்த்துக் கொண்டு ஒரு சிடியின் மீது இன்னொரு சிடியை போட்டு இயக்க முயற்சிப்பது; சிடியை தலைகீழாக வைத்து இயக்க முயற்சிப்பது; ஒரு சிடி என்று எண்ணிக் கொண்டு இரண்டு சிடிக்களை டிரைவில் வைப்பது போன்ற நிகழ்வுகள் நீங்களை நம்பாமல் இருக்கலாம். ஆனால் பல வேளைகளில் இவ்வாறு நடந்துள்ளது. நீங்களும் இந்த தவற்றை என்றாவது அவசரத்தில் செய்ய முற்படலாம். அவ்வாறு நேர்ந்துவிடாமல் பார்த்துக் கொள்ளவே இந்த எச்சரிக்கை தரப்படுகிறது.

9.சிடிக்கள் டேட்டாவினைப் பதிந்து வைத்திட நம்பகமான மீடியம் என்றாலும் அவையும் என்றாவது ஒரு நாள் அல்லது ஒரு வேளையில் பயன்படுத்த முடியாமல் போகலாம். எனவே சிடியில் டேட்டாக்களை எழுதி விட்டோமே என்று அந்த பைல்களை முற்றிலுமாக அழித்துவிடக் கூடாது. வேறு ஒரு மீடியத்தில் எழுதி வைக்கலாம். இன்னொரு கம்ப்யூட்டரில் அல்லது ஹார்ட் டிஸ்க்கின் இன்னொரு டிரைவில் போட்டு வைக்கலாம். இவ்வாறு பேக்கப் எடுத்து வைப்பது நல்லது.

10.பயன்படுத்த நல்ல தரமான நிறுவனங்கள் தயாரித்து வழங்கும் சிடிக்களையே வாங்க வேண்டும். விலை குறைவாக இருக்கிறது என்று தரம் குறைந்த சிடிக்களை வாங்கிப் பயன்படுத்துவது தவறு.

பைலுக்கு பாஸ்வேர்ட் கொடுக்கலாம்!

ஒரு டாகுமெண்ட் பைலை நீங்கள் மட்டுமே படிக்கும் படி அமைக்கலாம். இதற்கு பாஸ்வேர்ட் கொடுக்க வேண்டும். பாஸ்வேர்ட் கொடுத்த பின் அந்த பாஸ்வேர்டைச் சரியாகக் கொடுத்தால் தான் டாகுமெண்ட் திறக்கும். பாஸ்வேர்டைச் சரியாகக் கொடுக்க வில்லை என்றால் அல்லது பாஸ்வேர்ட் மறந்துவிட்டால் அந்த டாகுமெண்ட்டை மறந்துவிட வேண்டியதுதான். எனவே நன்றாக யோசித்து முடிவெடுத்து பாஸ்வேர்ட் கொடுத்து டாகுமெண்ட்டை பாதுகாக்கவும்.

டாகுமெண்ட் ஒன்றுக்கு பாஸ்வேர்ட் கொடுக்க டாகுமெண்ட்டைத் திறந்து பின் “Save As” என்ற பிரிவினை File மெனுவில் தேர்ந்தெடுக்கவும். சேவ் அஸ் டயலாக் பாக்ஸில் “Tools” பட்டனைக் கிளிக் செய்திடவும். இங்கு கிடைக்கும் மெனுவில் “General Options” என்ற பிரிவினைத் தேர்ந்தெடுக்கவும். இப்போது “Save” டயலாக் பாக்ஸ் திறக்கப்படும். இதில் பாஸ்வேர்ட் அமைத்திடத் தேவையான டயலாக் பாக்ஸ் கிடைக்கும். முதல் பாஸ்வேர்டை Password to open டெக்ஸ்ட் பாக்ஸில் அமைக்கவும். பின்னர் “Password to modify” என்ற பாக்ஸில் இரண்டாவது பாஸ்வேர்டை அமைக்கவும்.

பின் டயலாக் பாக்ஸின் ஓகே பட்டனைக் கிளிக் செய்திடவும். பின் வேர்ட் “Password to modify” என்ற டயலாக் பாக்ஸை பாஸ்வேர்டுகளை உறுதி செய்திடத் திறக்கும். ஒரு பாஸ்வேர்டின் அதிக பட்ச நீளம் 15 கேரக்டர்கள் மட்டுமே. மீண்டும் டாகுமெண்ட்டைத் திறக்கவும் டாகுமெண்ட்டை எடிட் செய்திடவும் அமைத்த பாஸ்வேர்டுகளைத் தவறின்றி அமைக்கவும். பின் டயலாக் பாக்ஸை ஒன்றன் பின் ஒன்றாக ஓகே கிளிக் செய்து மூடவும். அதன்பின் சேவ் அஸ் டயலாக் பாக்ஸில் உள்ள சேவ் பட்டனை அழுத்தி வெளியேறவும். இனி டாகுமெண்ட்டைத் திறந்து படிக்க ஒரு பாஸ்வேர்டும் அதில் மாற்றங்களை ஏற்படுத்த ஒரு டயலாக் பாக்ஸும் தந்தால் மட்டுமே டாகுமெண்ட் கிடைக்கும்.

ஆன்லைன் ஸ்டோர் ரூம்

மைக்ரோசாப்ட் நிறுவனம் அண்மையில் விண்டோஸ் லைவ் ஸ்கை ட்ரைவ் என்ற வசதியைத் தன் வாடிக்கையாளர்களுக்கு வழங்கியுள்ளது. பாஸ்வேர்ட் மூலம் பைல்களைப் பாதுகாத்து அவற்றை ஆன்லைனில் ஸ்டோர் செய்து வைக்கலாம். இதனால் உலகின் எந்த மூலையில் இருந்தும் நம் பைல்களை இறக்கிப் பயன்படுத்தலாம். அப்படி என்றால் நம் பைல்களை அடுத்தவர்கள் எடுத்துப் பார்த்துவிடுவார்களே என்ற அச்சம் ஏற்படுகிறதா? அல்லது இவ்வாறு வைத்திடும் சில பைல்களை நான் மட்டுமே பார்க்க வேண்டும்;

சில பைல்களை என் உறவினர்களும் நண்பர்களும் மட்டுமே பார்க்க வேண்டும்; மற்றவற்றை யார் வேண்டுமானாலும் பார்க்கலாம் என்று எண்ணுகிறீர்களா? உங்களுக்காகவே மைக்ரோசாப்ட் இந்த மூன்று வகைகளிலும் பைல்களை ஸ்டோர் செய்து வைக்கும் வசதியைத் தருகிறது.

Personal Folder என்ற பிரிவில் பாஸ்வேர்ட் மூலம் பாதுகாக்கப்பட்ட பைல்களை தனிநபர் பயன்பாட்டிற்கு மட்டும் என ஒதுக்கி வைத்துப் பயன்படுத்தலாம். Shared பிரிவில் பைல்களை அடுக்கி வைப்பவர்கள் தாங்கள் விரும்பும் நபர்கள் மட்டுமே பயன்படுத்தும் வகையில் அமைக்கலாம். Public என்ற பிரிவில் அனைவரும் பார்த்துப் பயன்படுத்தக் கூடிய ஷேர்வேர் பைல்களை வைக்கலாம். ஒவ்வொரு வாடிக்கையாளருக்கும் விண்டோஸ் லைவ் ஸ்கை டிரைவ் 5 ஜிபி அளவிலான இடத்தை அளிக்கிறது. இந்த இடத்தில் 1000 பாடல்கள், 30 ஆயிரம் டாகுமெண்ட்கள், 30 ஆயிரம் டிஜிட்டல் படங்களை வைக்கலாம். ஒரு பைலின் அளவு 50 எம்பிக்கும் மேல் இருக்கக் கூடாது.

இந்தியாவில் உள்ள அனைத்து வாடிக்கையாளர்களுக்கும் இந்த வசதி வழங்கப்படுகிறது. அவர்கள் விண்டோஸ் லைவ் ஐ.டி. மூலம் உலகின் எந்த மூலையில் இருந்தும் இந்த பைல்களை பயன்படுத்தலாம். அளவில்லாமல் பைல்களை கடிதங்களுடன் வைத்துக் கொள்ள இமெயில் தளங்கள் இருக்கும் போது இத்தகைய வசதி மக்களிடையே எடுபடுமா? என்ற சந்தேகத்துடன், இந்த கேள்வியை விண்டோஸ் லைவ் இந்தியா வர்த்தகப் பிரிவு தலைவர் சமீர் சரையா வைக் கேட்டபோது "இந்த வசதியின் மூலம் ஒருவர் தன் நண்பர்களுடனும் நெட்டில் உலாவரும் எவருடனும் தன் பைல்களைத் தேர்ந்தெடுத்து பகிர்ந்து கொள்ளலாம். இது இமெயில் அக்கவுண்ட் மூலம் முடியாது. உலக அளவில் 40 கோடி பேர் விண்டோஸ் லைவ் சர்வீஸைப் பயன்படுத்தி வருகின்றனர்.

இவர்கள் இன்டர்நெட் மையங்களில் என்ன மாதிரியான பைல் டவுண் லோட் களில் ஈடுபடுகிறார்கள் என்று ஆய்வு செய்த பின்னரே இந்த வசதியை வகைப்படுத்தி' வழங்க முன்வந்தோம்' என்று கூறினார். உங்களிடம் விண்டோஸ் லைவ், ஹாட் மெயில், மைக்ரோசாப்ட் பாஸ்போர்ட் இருந்தால் அதன் மூலம் இந்த விண்டோஸ் லைவ் ஸ்கை டிரைவை அதில் பதிந்திடாமலேயே பயன்படுத்தலாம். இது போன்ற வசதிகள் சில புராஜக்ட் தயாரிப்பில் ஈடுபடும் மாணவர்கள் குழுவினருக்கு பயன்படும். அவர்களுக்குள் குழுவாக பைல்களைப் பாதுகாப்பாக பகிர்ந்து கொள்ள இது ஒரு நல்ல வசதி. மற்றவர்களும் தங்களைப் பற்றிய பெர்சனல் தகவல்களை அடுத்தவர் அறியாமல் அதே நேரத்தில் தாங்கள் எண்ணிய போதெல்லாம் பயன்படுத்த பைல்களைப் பத்திரமாகப் பாதுகாக்கும் தள வசதியாக இது பயன்படும்.

விண்டோஸின் தொல்லைகள்

விண்டோஸ் ஆப்பரேட்டிங் சிஸ்டம் முற்றிலும் முழுமையான பாதுகாப்பான சிஸ்டம் இல்லை என்பது கம்ப்யூட்டர் பயன்படுத்தும் அனைவருக்கும் தெரியும். பல வேளைகளில் தேவையற்ற தொல்லைகளை விண்டோஸ் அளித்திடும். சில வேளைகளில் அவை சிறுவர்களின் சில்மிஷங்கள் போல் தோற்றமளித்திடும். இருந்தும் வேறு வழியின்றி அவற்றைப் பொறுத்துக் கொள்வோம். எடுத்துக் காட்டாக நாம் மறதியாய் ஒரு பிளாப்பி டிஸ்க்கை அதன் டிரைவில் விட்டிருப்போம்.

அடுத்த முறை விண்டோஸை இயக்கும்போது NonSystem Disk or disk error

இருந்தாலும் இது ஒரு தொல்லை தானே. இப்படி விண்டோஸ் கொடுக்கும் தொல்லைகள் சிலவற்றையும் அவை எதனால் ஏற்படுகிறது என்பதனையும் அவற்றை எப்படி சமாளிக்கலாம் என்பதனையும் இங்கு காணலாம்.

1. நகராத மவுஸ் கர்சர்: திடீரென கம்ப்யூட்டர் இயக்கம் உறைந்து போகும். மவுஸ் கர்சர் நகராது. என்ன செய்தாலும் ஒன்றும் இயங்காது. கண்ட்ரோல் + ஆல்ட்+ டெலீட் அழுத்தினாலும் ஒன்றும் இயங்காது. வேறு வழியின்றி ரீ பூட் பட்டனை அழுத்தி மீண்டும் இயங்க வைப்போம். இதற்கு என்ன காரணம்? பெரும்பாலும் நீங்கள் புதியதாக கம்ப்யூட்டரில் இன்ஸ்டால் செய்த புரோகிராமாக இருக்கும். எனவே மீண்டும் கம்ப்யூட்டரை ரீ பூட் செய்தவுடன் கடைசியாக இன்ஸ்டால் செய்த புரோகிராமினை அன் இன்ஸ்டால் மூலம் நீக்கவும். மீண்டும் அதே உறையும் பிரச்னை வரவில்லை என்றால் இந்த புரோகிராம் காரணமாக இருக்கலாம். இன்னொன்றையும் நீங்கள் கவனிக்க வேண்டும். நீங்கள் வயர்லெஸ் மவுஸ் பயன்படுத்துபவராக இருந்தால் உங்கள் மவுஸின் பேட்டரி உயிருடன் இருக்கிறதா என்று பார்க்கவும்.பேட்டரியை மாற்றிப் பார்க்கவும். ஒரு வேளை மவுஸ் கர்சர் நகரலாம்.

2. திடீரென ரீஸ்டார்ட்: பயன்படுத்திக் கொண்டிருக்கும்போதே திடீரென கம்ப்யூட்டர் தானே ரீஸ்டார்ட் ஆகும். கம்ப்யூட்டர் திரை கருப்பாக தோன்றி விண்டோஸை எவ்வாறு ஸ்டார்ட் செய்திட என்ற கேள்வியுடன் நான்கு ஆப்ஷன்ஸ் தரப்படும். அங்கு Start Windows Normally என்ற பிரிவைக் கிளிக் செய்திடவும். கம்ப்யூட்டர் வழக்கம்போல இயங்கத் தொடங்குகிறதா என்று பார்க்கவும். தொடங்கவில்லை என்றால் Last Known good configuration என்ற பிரிவில் கிளிக் செய்திடவும். இதுவும் சரியாகவில்லை என்றால் Safe Mode ல் தொடங்கவும். இது நிச்சயம் செயல்படத் தொடங்கும். இதனைப் பயன்படுத்தி முன்பு சொன்னது போல இறுதியாக இன்ஸ்டால் செய்த புரோகிராமினை அன் இன்ஸ்டால் செய்திடவும்.

3. தொடக்கத்தில் சொன்ன NonSystem Disk or disk error என்ற பிரச்னை ஏற்படுகையில் டிரைவில் உள்ள டிஸ்க்கினை நீக்கினாலும் சில வேளைகளில் பிரச்னைக்குத் தீர்வு கிடைக்காது. அப்படி என்றால் பிரச்னை மிகவும் சிக்கலானது தான். கம்ப்யூட்டரின் சிபியு கேபினைக் கழற்றி ஏதேனும் கேபிள் வயர் சரியாக இணைக்கப்படாமல் இருக்கிறதா என்று பார்க்கவும். குறிப்பாக ஹார்ட் டிஸ்க்கிற்குச் செல்லும் கேபிள் சரியாக இருக்கிறதா எனப் பார்க்கவும். அதனைச் சரி செய்தும் பிரச்னை தீரவில்லை என்றால் ஒரு ஹார்ட் வேர் டெக்னீஷியனை அழைத்துப் பார்க்கவும்.

4. One of your disks needs to be checked for consistency : கம்ப்யூட்டரை இயக்கத் தொடங்கும்போது இந்த செய்தி திரை முழுவதும் ஊதா வண்ணத்தில் வெள்ளை எழுத்துக்களில் தோன்றும். இந்த செய்தி வந்தால் அதற்கு முன் கம்ப்யூட்டரை இயக்கிய போது முறையாக அதன் இயக்கத்தினை நிறுத்தவில்லை என்று பொருள். அல்லது புரோகிராம் கிராஷ் ஏற்பட்டிருக்கலாம். அல்லது பவர் கட் ஆகி யு.பி.எஸ். கை கொடுக்காமல் கம்ப்யூட்டர் ஆப் ஆகி இருக்கலாம். இது போன்ற செய்திவந்து உங்கள் டிஸ்க்கைச் சோதிக்கும் பணி தொடங்கினால் அதனை நிறுத்த வேண்டாம். ஒரு சில நிமிடங்களில் இந்த சோதனை முடிந்து கம்ப்யூட்டர் இயங்கத் தொடங்கும். இது உங்கள் ஹார்ட் டிஸ்க் சரியாக உள்ளதா என்ற சோதனை என்பதால் உங்கள் கம்ப்யூட்டருக்கும் நல்லதுதான்.

ஆனால் ஒவ்வொரு முறை கம்ப்யூட்டரை இயக்கத் தொடங்கும் போதும் இந்த செய்தி வந்தால் உங்கள் பெர்சனல் கம்ப்யூட்டரை நீங்கள் ஷட் டவுண் செய்திட நடவடிக்கைகள் எடுக்கையில் பின்புலத்தில் ஏதோ ஒரு புரோகிராம் இயங்கிக் கொண்டிருக்கிறது என்று பொருள். எனவே ஷட் டவுண்ட் செய்வதற்கு முன்னால் கண்ட்ரோல் + ஆல்ட்+டெலீட் போட்டு எந்த எந்த புரோகிராம்கள் நீங்கள் அறியாமல் இயங்கிக் கொண்டிருக்கின்றன என்று பார்த்து அவற்றை நிறுத்தவும். அவை மீண்டும் தாமாக இயங்குவதனை நிறுத்தவும்.

5. Blue Screen of Death: ஆம், இப்படி ஒரு திரை நம் கம்ப்யூட்டரில் சில வேளைகளில் ஏற்படும். A fatal exception 0E has occurred என்று தொடங்கி அப்போது இயங்கிய அப்ளிகேஷன் புரோகிராமினை உடனே முடக்கிவிடு என்று கேட்கும். கண்ட்ரோல் + ஆல்ட்+டெலீட் கொடுத்து கம்ப்யூட்டரை ரீ ஸ்டார்ட் செய்திடச் சொல்லும். "நீங்கள் சேவ் செய்யாத தகவல் எல்லாம் அவ்வளவுதான் அம்போ' என்று ஒரு மிரட்டும் செய்தியும் வரும். என்ன செய்வது? வேறு வழியே இல்லை. போனால் போகட்டும் போடா ! என்று மீண்டும் ரீஸ்டார்ட் செய்திட வேண்டியதுதான். இந்த டெத் ஸ்கிரீன் அடிக்கடி வந்ததென்றால் ரெஸ்டோர் பயன்படுத்தி முந்தைய ரெஸ்டோர் பாய்ண்ட்டுக்குச் செல்ல வேண்டியதுதான். இதனைப் பெற Start, Accessories, System Tools, System Restore என வரிசையாகச் சென்று பெறலாம்.

6. End Program: சின்ன விண்டோ ஒன்றில் This program ‘Program has encountered a problem’ is not responding போன்ற பிழைச் செய்தி கிடைக்கும். புரோகிராமில் எந்த பிரச்னையும் இல்லை என உறுதியாகத் தெரிந்தால் தொடர்ந்து அதனை இயக்கப் பார்க்கவும். ஆனால் ஏற்கனவே கம்ப்யூட்டர் முடங்கிப் போயிருந்தால் வேறு வழியின்றி புரோகிராமை மூடி வெளியேறி பின் மீண்டும் வரவும்.

7.‘Program has encountered a problem and needs to close’: அடிக்கடி கிராஷ் ஆகும் புரோகிராம்கள் இது போன்ற செய்தியைக் கொடுக்கும். இதை நீங்கள் ஒன்றும் செய்திட முடியாது. ஏனென்றால் ஏற்கனவே புரோகிராம் கிராஷ் ஆகிவிட்டது. இதில் Send Error Report என்ற பிரிவில் கிளிக் செய்து இன்டர்நெட் இணைப்பில் மைக்ரோசாப்ட் நிறுவனத்திற்கு பிழைச் செய்தி குறித்து தகவல் அனுப்பலாம். ஆனால் ஒரு சில சமயங்களில் மைக்ரோசாப்ட் நிறுவனத்தின் தளத்திலிருந்து இந்த பிழை புராசசர் சிப்பினால் ஏற்பட்டது. இதற்கு இன்னும் நிவாரணம் இல்லை என்ற பதிலும் வரலாம்.

8. மெதுவாக இயங்குதல்: கம்ப்யூட்டர் வாங்கிய தொடக்கத்தில் மிக வேகமாக இயங்கிய கம்ப்யூட்டர் சில மாதங்களிலேயே மெதுவாக இயக்கத்திற்கு வரும். சி.பி.யு. பட்டனை அழுத்திய பின் விண்டோஸ் டெஸ்க்டாப் வர அதிக நேரம் பிடிக்கலாம். இதற்குக் காரணம் ஸ்டார்ட் அப் மெனுவில் நிறைய புரோகிராம்களை அமைத்திருப்பதுதான். இதனை எளிதாக சரி செய்துவிடலாம். இதற்கு ஸ்டார்ட் கிளிக் செய்து பின் ரன் விண்டோவில் msconfig என டைப் செய்திடவும். கிடைக்கும் விண்டோவில் Starup டேப்பினைத் தேர்ந்தெடுத்து வரும் விண்டோவைப் பார்க்கவும்.

அதில் உள்ள புரோகிராம் பட்டியலைப் பார்க்கவும். உங்கள் கம்ப்யூட்டர் அத்தனை புரோகிராம்களையும் தொடங்கி பின்னணியில் இயங்கிய பின்னரே உங்களுக்கு டெஸ்க் டாப்பைக் காட்டுகிறது. எனவே எந்த எந்த புரோகிராம் உங்களுக்குத் தேவையில்லையோ அவற்றை ஸ்டார்ட் அப் பட்டியலில் இருந்து நீக்கிவிடவும். இதற்கு அந்த புரோகிராமின் முன் உள்ள சிறிய கட்டத்தில் இருந்த டிக் அடையாளத்தை எடுத்துவிட்டால் போதும்.

9. Access Denied: இந்த பிழைச் செய்தி ஒரு குறிப்பிட்ட பைலை நோக்கி காட்டப்படும். ஒரு பைலில் திருத்தங்கள் செய்திட முயன்று அவற்றை சேவ் செய்திட முயற்சிக்கையில் இந்த பிழைச் செய்தி கிடைக்கும். பைல் அது போல மாற்றங்களை மேற்கொள்ளவிடாமல் வடிவமைக்கப்பட்டிருக்கும். இதனை எளிதாக ஏமாற்றலாம். குச்திஞு அண் கட்டளை கொடுத்து வேறு பெயரில் சேவ் செய்திடலாம்.

10. Missing Shortcut: சில புரோகிராம்களை கம்ப்யூட்டரிலிருந்து நீக்கும்போது டெஸ்க்டாப்பிலிருக்கும் ஷார்ட்கட் ஐகானும் நீக்கப்பட வேண்டும். சில வேளைகளில் அந்த ஷார்ட் கட் ஐகான் காட்டும் புரோகிராமினை வேறுடிரைவிற்கு மாற்றி இருப்போம். அப்போது இந்த பிழைச் செய்தி காட்டப்பட்டு Windows is searching for [File Name] To locate the file yourself click Browse என்ற செய்தி கிடைக்கும். புரோகிராம் நீக்கப்பட்டுவிட்டது என்று தெரிந்தால் இந்த ஷார்ட் கட் ஐகானையும் நீக்கிவிடுங்கள்.

11. "Can’t Boot from Windows CD”: விண்டோஸ் தொகுப்பினை ரிப்பேர், ரீ இன்ஸ்டால் அல்லது அப்கிரேட் செய்ய வேண்டியதிருந்தால் கம்ப்யூட்டரை விண்டோஸ் சிஸ்டம் சிடியிலிருது பூட் செய்ய வேண்டியதிருக்கும். ஆனால் அப்படி பூட் செய்திட முயற்சிக்கையில் இந்த செய்தி வரும். ஏன்? சிடியிலிருந்து பூட் செய்திட வகுத்திடும் வழி அடைக்கப்பட்டிருக்கும். இதனை எப்படி திறப்பது? விண்டோஸ் இயங்கத் தொடங்குகையில் Delete பட்டனை அழுத்தவும். BIOS ஸ்கிரீன் தோன்றும். அப்படித் தோன்றவில்லை என்றால் டெலீட் கீக்குப் பதிலாக F2 கீயை அழுத்தவும்.

கர்சர் கீ மூலம் பூட் செக்ஷன் சென்று என்டர் அழுத்தவும். உடன் கம்ப்யூட்டர் பூட் செய்ய எந்த வரிசையில் செயல்பட வேண்டும் என்ற வரிசை கிடைக்கும். நீங்கள் முதலில் சிடி, பின் ஹார்ட் டிஸ்க் வழியாக என்றால் அதற்கேற்ப வரிசையினை மாற்றி அமைக்கவும். வேறு எதனையும் மாற்ற வேண்டாம். இந்த மாற்றத்தை சேவ் செய்து வெளியேறி விண்டோஸ் சிடியை டிரைவில் போட்டு பின் பூட் செய்தால் கம்ப்யூட்டர் சிடி டிரைவில் உள்ள விண்டோஸ் சிடி வழியாக பூட் ஆகும்.

12. டாஸ்க் பார் பட்டனில் புரோகிராம்கள் அடுக்கு: சில வேளைகளில் ஒரே புரோகிராம்களில் பல திறக்கப்படுகையில் அவைடாஸ்க் பாரில் ஒரு பட்டனில் அடுக்கப்படும். எடுத்துக் காட்டாக வேர்ட் தொகுப்பில் பல டாகுமெண்ட்டுகள் திறக்கப்பட்டால் அவை வேர்ட் என்ற பட்டனிலேயே அடுக்கப்படும். எத்தனை புரோகிராம்கள் உள்ளன என்று எண் காட்டப்படும். இவற்றில் ஏதேனும் ஒன்றைத் திறந்து பயன்படுத்த எண்ணினால் பட்டனைக் கிளிக் செய்து பின் கிடைக்கும் அடுக்கில் நாம் விரும்பும் புரோகிராமினை கிளிக் செய்து இயக்க வேண்டும். இது நேரம் எடுக்கும் வேலை. டாஸ்க்பாரில் ஒவ்வொரு டாகுமெண்ட்டும் காட்டப் பட்டால் இந்த வேலை மிச்சமாகும். என்ன செய்யலாம்? டாஸ்க் பாரில் எங்கேனும் ரைட் கிளிக் செய்து கிடைக்கும் மெனுவில் புராபர்ட்டீஸ் தேர்ந்தெடுங்கள். கிடைக்கும் டயலாக் பாக்ஸில் Group similar Taskbar buttons என்ற இடத்தில் டிக் அடையாளத்தை எடுத்து விடுங்கள். இனி பைல்கள் அடுக்கப்பட மாட்டாது.

13. Low Disk space warning: விண்டோஸ் எக்ஸ்பி சிஸ்டத்தில் திடீரென திரையில் வலது மூலையில் ஹார்ட் டிஸ்க்கில் இனி ஸ்பேஸ் இல்லை என்ற பொருள் பட இந்த செய்தி கிடைக்கும். இதனால் பெரிய விபத்து இல்லை. உடனே சி டிரைவில் தேவையற்ற பைல்கள், டெம்பரரி போல்டரில் உள்ள பைல்கள் ஆகியவற்றைக் காலி செய்யவும். முக்கிய பைல்கள் இருந்தால் அவற்றை வேறு டிரைவிற்கு மாற்றவும். இவ்வாறு செய்து ஓரளவிற்கு டிஸ்க்கில் ஸ்பேஸ் உண்டாக்கினால் இந்த எச்சரிக்கை செய்தி வராது.

எக்ஸ்புளோரர் டேப் ஷார்ட்கட்ஸ்

இன்டர் நெட் எக்ஸ்புளோரர் பதிப்பு 7ன் டேப் வழி பிரவுசிங் இந்த தொகுப்பு அறிமுகப்படுத்தப்பட்ட போது மிகவும் பிரபலமாகப் பேசப்பட்டது. பலர் இத்தொகுப்பிற்கான புதிய ஷார்ட் கட் கீகளின் தொகுப்பு குறித்து அறிந்து கொள்ள முயற்சித்தனர்.

பலருக்கு இந்த தொகுப்பு எளிதான ஒன்றாக மாறிவிட்டிருந்தாலும் சிலருக்கு இன்னும் பல விஷயங்கள் புரியாததாகவே உள்ளன. ஒரு வாசகர் டேப் பிரவுசிங் மட்டும் குறித்த சில ஷார்ட் கட் கீகளைக் கூறுங்கள் என்று கேட்டிருக்கிறார்.

அவற்றைக் கூறும் முன் ஒரு சிறிய என் எண்ணம். எந்த புதிய தொகுப்பு வந்தாலும் அதனை நம் பழக்கத்திற்கும் புழக்கத்திற்கும் கொண்டு வருவதற்கு சில நாட்களாகும். இது நாம் அந்த தொகுப்பின் மீது கொண்டுள்ள பார்வையைப் பொறுத்தது. இது நமக்கு வராது என்று எண்ணிக் கொண்டே புதிய சாப்ட்வேர் புரோகிராம்களைக் கையாண்டால் அது நமக்கு எட்டாக் கனியாகவே இருக்கும். புது வசதிகள் எளிதாக நமக்குக் கிடைக்கும் எனப் பயன்படுத்தத் தொடங்கினால் நிச்சயம் புரோகிராம் நம் வசத்திற்கு வரும்.

இனி இன்டர்நெட் எக்ஸ்புளோரர் பதிப்பு 7க் கான டேப் பயன்பாடு குறித்த ஷார்ட் கட் கீகளை இங்கு காண்போம். இந்த பதிப்பின் அதிக பயன் தரும் புதிய வசதி இந்த டேப் பிரவுசிங் ஆகும். எனவே இங்கே தரப்படும் ஷார்ட் கட் கீகள் அனைவருக்கும் அதிகம் பயனுள்ளதாக இருக்கும்.

Ctrl + T: முன்பகுதியில் புதிய டேப் ஒன்றைத் திறக்கும்
Ctrl + Click: இணைய தளப் பக்கத்தில் உள்ள லிங்க்குகளில் கிளிக் செய்தால் பின்னணியில் புதிய டேப்பில் இந்த லிங்கிற்கான தளம் திறக்கப்படும்.
Ctrl + Shift + Click: இணைய தளப் பக்கத்தில் உள்ள லிங்க்குகளில் கிளிக் செய்தால் முன்னணியில் புதிய டேப்பில் இந்த லிங்கிற்கான தளம் திறக்கப்படும்.
Alt + Enter: அட்ரஸ் பாரிலிருந்து ஒரு புதிய டேப் திறக்க. இந்த கீகளே சர்ச் பாக்ஸிலிருந்தும் ஒரு புதிய டேப் ஒன்றைத் திறக்கும்.
Ctrl + Q : தம்ப் நெயில் என அழைக்கப்படும் காட்சித் தோற்றங்களில் வேகமாக டேப்களைத் திறக்க
Ctrl + Tab: அல்லது Ctrl + Shift + Tab: டேப்களுக்கு இடையே வேகமாகப் புகுந்து செல்ல
Ctrl + N : இந்த கீ தொகுப்பில் N என்ற இடத்தில் 1 முதல் 8 வரையிலான எண்ணைத் தந்தால் அந்த எண்ணில் உள்ள டேப்பிற்கு எடுத்துச் செல்லப்படுவீர்கள்.
Ctrl + 9 : இறுதியாக உள்ள டேப்பிற்கு எடுத்துச் செல்லப்படுவீர்கள்
Ctrl + W : தற்போது உள்ள டேப்பில் உள்ள இணைய தளம் மூடப்படும்.
Ctrl + Alt +F4: மற்ற அனைத்து டேப்களும் மூடப்படும்.
Alt +F4: அனைத்து டேப்களும் மூடப்படும்.

இன்னும் சில மவுஸ் ஒன்றைப் பார்ப்போமா!
உங்களுடைய மவுஸில் நடுவில் ஒரு பட்டன் அல்லது ஸ்குரோல் வீல் இருக்கும் பட்சத்தில் வெப்சைட்டில் ஏதேனும் ஒரு லிங்க்கில் கிளிக் செய்தால் அந்த தொடர்புக்கான தளம் பின்னணியில் புதிய டேப்பில் திறக்கப்படும்.

கண்ணை உறுத்துதா டெஸ்க்டாப் ?

ஆக்டிவ் டைட்டில் பார் – சைஸ் அளவை 21க்கு மாற்றவும். கலர் 1 மற்றும் கலர் 2 – எந்த வண்ணம் உங்கள் கண்களுக்கு உறுத்தாமல் கிளேர் அடிக்காமல் இருக்குமோ அந்த வண்ணங்களைத் தேர்ந்தெடுக்கவும்.

டிஸ்பிளே செட்டிங்ஸ் குறித்து சென்ற வாரம் வெளியிடப்பட்ட கட்டுரையைப் படித்த பின் பல வாசகர்கள் தங்கள் கம்ப்யூட்டர் திரை புது ஜொலிப்புடன் இருப்பதாக எழுதி உள்ளனர். ஆனால் பலர் தங்கள் மானிட்டரில் உள்ள சில வண்ணங்கள் கண்களை உறுத்துவதாகவும் அதனை எப்படி மாற்றுவது என்றும் கேட்டுள்ளனர்.

ஒரு சிலர் எழுத்துக்கள் சிறியதாக இருப்பதாகவும் ஏற்கனவே கண்ணாடி அணிந்தவர்களுக்கும் இது தொல்லை தருவதாகவும் எழுதி உள்ளனர். இவர்களுக்கான தகவல் குறிப்புகள் இதோ: கீழே தரப்பட்டுள்ள குறிப்புகள் மூலம் ஒரு முறை நீங்கள் டெஸ்க்டாப் செட் செய்துவிட்டால் பின் மாற்ற வேண்டிய அவசியம் ஏற்படாது.

1. முதலில் கிளாசிக் ஸ்டார்ட் மெனுவிற்கு மாற்றிக் கொள்ளுங்கள். ஸ்டார்ட் பட்டனில் ரைட் கிளிக் செய்து பின் புராபர்ட்டீஸ் பிரிவில் கிளிக் செய்திடவும்.

2. பின் ஸ்டார்ட் மெனு டேப்பில் கிளாசிக் ஸ்டார்ட் மெனு என்பதைத் தேர்ந்தெடுக்கவும்.

3. ஓகே கிளிக் செய்திடவும். விண்டோஸ் எக்ஸ்பி தோற்றத்திலிருந்து விண்டோஸ் கிளாசிக் தோற்றத்திற்கு மாற்றிட:

1. டெஸ்க் டாப்பில் காலியாக உள்ள இடத்தில் (ஷார்ட் கட்களை விட்டுவிடுங்கள்) ரைட் கிளிக் செய்து புராபர்ட்டீஸ் பிரிவைத் தேர்ந்தெடுங்கள்.

2. டிஸ்பிளே புராபர்ட்டீஸ் விண்டோவில் தீம்ஸ் டேப் சென்று அதில் விண்டோஸ் கிளாசிக் என்ற தீமைத் தேர்ந்தெடுக்கவும்.

3. அடுத்து அப்பியரன்ஸ் டேப் செல்லவும். அதில் அட்வான்ஸ்டு பட்டனில் கிளிக் செய்திடவும்.

4. அட்வான்ஸ் அப்பியரன்ஸ் விண்டோவில் ஆக்டிவ் விண்டோ என்ற டெக்ஸ்ட்டில் கிளிக் செய்திடவும். இனி கீழ்க்காணும் மாற்றங்களை மேற்கொள்ளவும்.
ஆக்டிவ் டைட்டில் பார் – சைஸ் அளவை 21க்கு மாற்றவும்.
கலர் 1 மற்றும் கலர் 2 – எந்த வண்ணம் உங்கள் கண்களுக்கு உறுத்தாமல் கிளேர் அடிக்காமல் இருக்குமோ அந்த வண்ணங்களைத் தேர்ந்தெடுக்கவும்.

பாண்ட் டைப்: டகோமா என்ற பாண்ட்டை தேர்ந்தெடுக்கவும். இது படிப்பதற்கு எளிதாக இருக்கும். இதன் சைஸ் 12 எனத் தேர்ந்தெடுக்கவும். ( இந்த அளவு உங்களுக்குச் சிறியதாகத் தோன்றினால் இன்னும் கொஞ்சம் அளவைக் கூட்டிக் கொள்ளலாம்.) இதன் கலர் என்பதில் கருப்பினைத் தேர்ந்தெடுக்கவும்.

5. அடுத்த நார்மல் என்று இருக்கும் பட்டையில் உள்ள டெக்ஸ்ட் மீது கிளிக் செய்திடவும். இதில் கீழ்க்காணும் மாற்றங்களை மேற்கொள்ளவும்:

மெனு: சைஸ் 21 தேர்ந்தெடுக்கவும். கலர் 1 – என்பதில் கிரே கலரை செலக்ட் செய்திடுங்கள்.

பாண்ட் டைப்: இதில் ஏரியல் என்ற எழுத்தை தேர்ந்தெடுக்கவும். (இந்த எழுத்துவகையும் படிப்பதற்கு எளிதாக கண்ணுக்கு உறுத்தல் இல்லாமல் இருக்கும்.) சைஸ் 12 ஆகவும் கலர் கருப்பாகவும் இருக்கட்டும்.
அடுத்து மெசேஜ் டெக்ஸ்ட் என்பதில் உள்ள டெக்ஸ்ட்டில் கிளிக் செய்திடவும்.
மெனு சைஸை 21க்கு அமைக்கவும்.

இறுதியாக விண்டோஸ் டெக்ஸ்ட் என்பதில் உள்ள டெக்ஸ்ட்டில் கிளிக் செய்து கீழ்க்காணும் மாற்றங்களை ஏற்படுத்தவும்.

கலர் 1: இதில் அதர் என்பதில் கிளிக் செய்திடுங்கள். நான் இள மஞ்சள் நிறத்தைத் தேர்ந்தெடுத்தேன். உங்களுக்கு இதமான வண்ணமாக நீங்கள் தேர்ந்தெடுக்கவும்.

பேசிக் கலர்ஸ்: இதில் கறுப்பான அல்லது இருட்டான தோற்றத்தினை சிறிது குறைத்துக் காட்டுவதற்காக மஞ்சள் நிறத்தைத் தேர்ந்தெடுக்கவும். இங்கு படத்தில் உள்ளது போல ஸ்கிரீன் தோற்றத்தில் வலது பக்கத்தில் இடது புறமாகச் சாய்ந்த அம்புக்குறியினைப் பார்த்தீர்களா? இந்த அம்புக் குறியில் கிளிக் செய்து அப்படியே மேலேயும் கீழேயும் இழுக்கவும். எந்த இடத்தில் உள்ள மஞ்சள் நிறம் கண்களுக்கு இதமாக இருக்கிறதோ அந்த இடத்தில் நிறுத்தவும்.

உங்களுக்கு இருட்டாக இருப்பதே இதம் என்றால் அம்புக் குறியை கீழே கீழே கொண்டு வரவும். ஓகே, இந்த செலக்ஷனை முடித்தபின் மீண்டும் தீம் டேபிற் குச் செலவும். சேவ் அஸ் பட்டனைக் கிளிக் செய்து பின் சேவ் பட்டனை கிளிக் செய்திடவும். அடுத்து விண்டோஸ் நீங்கள் மேற்கொண்ட மாற் றங்களை அமல்படுத்தும் வரை காத்திருக்கவும்.

இப்போது மாற்றங்களை அமைத்தாயிற்று. இனி கம்ப்யூட்டரை ரீ ஸ்டார்ட் செய்திடுங்கள். உங்கள் கண்களுக்கு விருந்தளிக்கும் வகையிலானா செட்டிங்ஸோடு புதிய தோற்றத்தில் விண்டோஸ் உங்களுக்குக் காட்சி அளிக்கும்.

இணையத்தில் கிடைக்கும் இலவச நூல்கள்

எலக்ட்ரானிக் புக் என்று சொல்லக் கூடிய இ–புக் நூல்கள் மாணவர்களிடமும் விஷயங்களை அறிந்து கொள்ள விரும்பும் மற்றவர்களிடமும் பிரபலமாகி வருகின்றன. இ–புக் படிப்பதில் என்ன லாபம் என்றால் இவற்றில் பெரும்பாலானவை இலவசமாகக் கிடைக்கின்றன.

சிடிக்களில் பதிந்து எடுத்துச் செல்வது எளிது. அதிலேயே குறிப்புகளையும் எழுதி வைக்கலாம். பல நூல்களில் உள்ள ஒரே விஷயத்தைத் தொகுத்து வைத்து படிக்கலாம்.

நமக்குத் தேவையான பக்கங்களை மட்டும் பிரிண்ட் எடுத்து படிக்கலாம். ஒரு சில பக்கங்களுக்காக ஒரு புத்தகத்தையே விலை கொடுத்து வாங்கத் தேவையில்லை. எத்தனை ஆண்டுகளானாலும் இந்த நூல்கள் கிழியவோ அழியவோ போவதில்லை. யாரும் வாங்கிச் சென்று திருப்பித் தரவில்லை என்ற பிரச்னையும் இல்லை. எளிதாக ஒரு பென் டிரைவில் காப்பி செய்து எடுத்துச் செல்லலாம். மேலும் இன்னொருவருக்கு இமெயில் மூலமாக அனுப்பவும் செய்திடலாம். இணையத்தில் பல இடங்களில் இத்தகைய நூல்கள் கிடைக்கின்றன.

அவற்றில் கீழ்க்காணும் மூன்று தளங்கள் சிறப்பாக இயங்குகின்றன. முதல் தளம் www.freeebooks.net. இதில் உள்ள நூல்களில் எத்தனை நூல்களை வேண்டுமானாலும் இலவசமாக டவுண்லோட் செய்திடலாம். உங்களுக்கு வேண்டிய உதவியினைத் தந்து தேவையான பொருளில் உள்ள நூல்களைக் காட்டுகிறது. அடுத்த தளம் www.ebooklobby.com இந்த தளத்தில் நூல்கள் வகைப்படுத்தப்படுள்ளன. வர்த்தகம், கலை, கம்ப்யூட்டிங், கல்வியியல் என அத்தனை பிரிவுகளிலும் நூல்கள் உள்ளன. எந்த வகையில் நூல்களைத் தேடுகிறீர்களோ அதனை கிளிக் செய்து உங்களுக்கான நூல்களை எடுக்கலாம், படிக்கலாம்.

www.getfreeebooks.com இதுவும் இலவசமாக நூல்களைத் தரும் தளம். எத்தனை நூல்களை வேண்டுமானாலும் டவுண்லோட் செய்து கொள்ளலாம். இணையம் முழுவதும் தேடிப் பார்த்து அனைத்து இ புக்குகளையும் இங்கு வெளியிட்டுள்ளனர். சில நூல்களை அவர்களே தயாரித்து வழங்குகின்றனர். நீங்கள் சிறப்பானது என்று எண்ணும் இ-புக் இந்த தளத்தில் இல்லையா? இந்த தளத்தின் அட்மினிஸ்ட்ரேட்டருக்கு இமெயில் மூலம் தெரிவித்தால் அவர் அதனைப் படித்துப் பார்த்து சேர்த்துவிடுவார்.

உங்கள் பாடலை ராக் இசையில் கேட்கலாம்: உங்களுக்கு ஆங்கிலத்தில் பாடல் எழுதத் தெரியுமா? தனித் திறமை ஒன்றும் தேவையில்லை. Happy Birthday to You My dear என்று எழுதினாலும் அது ஒரு பாடல் தான். இப்படி உங்கள் பிரியமானவருக்கு பாடல் எழுதி அதனை ராக் இசைப் பாடல்களைப் பாடுபவர்கள் பாடி அதனை அவருக்கு பிறந்த நாள் பரிசாக அனுப்பினால் எப்படி இருக்கும்? இதற்கென ஒரு வேடிக்கையான இணையதளம் உள்ளது. இதன் முகவரி http://www.srse/p1/src/ sing/ ஸ்பீச் டு டெக்ஸ்ட் தொழில் நுட்பம் கேள்விப் பட்டிருப்பீர்கள்.

இது டெக்ஸ்ட் டு ஸ்பீச் என்ற வகையில் செயல்படுகிறது. உடன் இசையையும் சேர்க்கிறது. தற்போதைக்கு இந்த பாடல் தளத்தின் அகராதியில் 1,400 சொற்கள் மட்டுமே இருக்கிறது. நீங்கள் உங்கள் தோழி விஜயாவிற்கு பிறந்த நாள் வாழ்த்து கவிதை எழுதி அதைப் பாடலாக அனுப்பச் சொன்னால் இந்த மாதிரி விஜயா என்ற சொல் இல்லை. இந்த சொல் உள்ள பாடல் ஏதாவது இருந்தால் எங்களுக்கு அனுப்புங்கள் என்ற செய்தி உங்களுக்குக் காட்டப்படும். வேடிக்கையாக இருந்தாலும் இது ஒரு புது அனுபவம்தான். தளத்திற்குச் சென்று பார்த்து அனுபவியுங்கள். முதலில் உங்களுக்கே ஒரு கவிதை ஒன்றை எழுதி இதன் மூலம் அனுப்பிப் பாருங்கள். பின் உங்கள் தோழர்களுக்கு அனுப்புங்கள்.

நீங்கள் விரும்பும் வண்ணங்கள்

விண் டோஸ் மற்றும் இன்டர்நெட் எக்ஸ்புளோரர் பக்கங்களை நீங்கள் விரும்பும் வகையிலான எழுத்துக்களிலும் வண்ணங்களிலும் அமைத்துக் கொள்ளலாம். அதற்கான வழிகள் இதோ:

1. முதலில் ஸ்டார்ட் கண்ட்ரோல் பேனல் (Start, Control Panel) சென்று கண்ட் ரோல் பேனலைத் திறக்கவும்.

2.டிஸ்பிளே (Display) ஐகானில் டபுள் கிளிக் செய்திடவும். (இதற்கு கிளாசிக் வியூவில் உங்கள் கண்ட்ரோல் பேனல் இருக்க வேண்டும்)

3. Display Properties விண்டோவில் Appearance டேப் சென்று அதில் Advanced பட்டனில் கிளிக் செய்திடவும்.

4. Advanced Appearance விண்டோவில் Item என்ற கீழ் விரியும் மெனுவில் கிளிக் செய்து பட்டியலில் Window என்பதில் கிளிக் செய்திடவும்.

5. Color1 பாக்ஸ் என்பது பேக்ரவுண்ட் கலர். Color பாக்ஸ் என்பது டெக்ஸ்ட் கலர். இந்த பாக்ஸ்களில் கிளிக் செய்து நீங்கள் விரும்பும் கலரைத் தேர்ந்தெடுத்து செட் செய்யலாம்.

6. தேர்ந்தெடுத்து முடித்த பின் அட்வான்ஸ்டு அப்பியரன்ஸ் விண்டோவில் ஓகே கிளிக் செய்து மூடி பின் டிஸ்பிளே புராபர்ட்டீஸ் விண்டோவிற்கும் ஓகே கிளிக் செய்து மூடவும். இனி கம்ப்யூட்டரில் எந்த போல்டர் சென்றாலும் நீங்கள் தேர்ந்தெடுத்த வண்ணங்களில் விண்டோவும் எழுத்துக்களும் அமைந்திருப்பதனைக் காணலாம்.

இன்டர்நெட் எக்ஸ்புளோரர் மூலமாக நீங்கள் பார்க்கும் அனைத்து எச்.டி.எம்.எல். பக்கங்களும் இதே போல நீங்கள் விரும்பும் வண்ணங்களில் அமைந்திட வேண்டும் என்றால் இந்த ஆப்ஷனை இன்டர்நெட் எக்ஸ்புளோரர் தொகுப்பில் ஏற்படுத்த வேண்டும்.

7. இன்டர்நெட் எக்ஸ்புளோரர் விண்டோ ஒன்றைத் திறந்து Tools Internet Options சென்று அதில் Accessibility Options கிளிக் செய்திடவும்.

8. Accessibility விண்டோவில் Formatting பிரிவில் உங்களுக்குப் பிடித்த வகையில் விருப்பத்தைத் தேர்ந்தெடுத்து டிக் செய்திடுங்கள். பின் ஓகே கொடுத்து வெளியேறவும். இனி இன்டர்நெட் எக்ஸ்புளோரரில் இணைய தளப் பக்கங்கள் நீங்கள் செட் செய்தபடியான வண்ணங்களில் அமைந்திருக்கும்.

இன்டர்நெட் தள பக்கங்கள் விண்டோவிற்கென அமைத்த வண்ணங்களில் அல்லாமல் வேறு வண்ணங்களில் அமைந் திட வேண்டும் என விரும்பினால் இதனை இன்டர்நெட் ஆப்ஷன்ஸ் விண்டோ பெற்று அமைத்திட வேண்டும்.

9.இதற்கு இன்டர்நெட் எக்ஸ்புளோரர் விண்டோ ஒன்றைத் திறந்து Tools Internet Options செல்லவும்.

10. இதில் Colors பட்டனை அழுத்தவும். கிடைக்கும் விண்டோவில் தேவையான கலரைத் தேர்ந்தெடுக்கவும். பின் ஓகே கிளிக் செய்திடவும். பக்கங்களுக்கென ஒரு கலரையும் அதில் கிடைக்கும் லிங்க்குகளுக்கென ஒரு கலரையும் செட் செய்திடலாம்.

11. அடுத்து Fonts என்ற பட்டனை அழுத்தவும். கிடைக்கும் விண்டோவில் நீங்கள் விரும்பும் எழுத்து வகையினை அமைக்கலாம். இதன் மூலம் இன்டர்நெட் எக்ஸ்புளோரர் பக்கங்கள் நீங்கள் தேர்ந்தெடுத்த வண்ணங்களிலான எழுத்துவகையில் காட்டப்படும். இது போல உங்கள் மனதிற்குப் பிடித்த வண்ணங்களில் விண்டோக்கள், அதில் சொற்கள், இணைய தளப் பக்கங்கள் ஆகியவற்றை அமைத்துவிட்டால் உங்கள் கம்ப்யூட்டர் புதிய ஒன்றாகக் காட்சி அளிக்கும். உங்களுக்கும் மனதிற்குப் புத்துணர்ச்சி கிடைக்கும்.

கண்ட்ரோல் பேனல் இரு தோற்றங்கள்

இது குறித்த சிறு குறிப்பு ஒன்றை இந்த பகுதியில் வெளியிட்டிருந்தாலும் பல வாசகர்கள் கண்ட்ரோல் பேனலின் இரு வேறு தோற்றங்கள் குறித்து கேள்விகள் அனுப்பியுள்ளதால் மீண்டும் சற்று விளக்கமாக இங்கு தருகிறேன்.

கண்ட்ரோல் பேனல் விண்டோ நமக்கு இருதோற்றங்களில் கிடைக்கிறது. அவை Classic View மற்றும் Category View என அழைக்கப் படுகின்றன. இந்த இரண்டு வெவ்வேறு தோற்றங்களைக் கொண்டு வழக்கமான கண்ட்ரோல் பேனலில் மேற்கொள்ளக் கூடிய அனைத்து பணிகளைச் செயல்படுத்தலாம்.

ஒன்றுக்கொன்று தோற்றத்தில் தான் வேறுபாட்டினைக் கொண்டுள்ளதே தவிர செயல்பாடுகளில் அல்ல. அதே போல இரண்டு வெவ்வேறு தோற்றங்களுக்கிடையே மிக எளிதாக மாற்றிக் கொள்ளவும் செய்யலாம். முதலில் கிளாசிக் வியூவைக் கவனிப்போம். இதனை நீங்கள் தேர்ந்தெடுத்தால் பலவகையான ஐகான்களுடன் ஒரு விண்டோ கிடைக்கும். இந்த ஐகான்களின் மூலம் அனைத்து பிரிவுகளையும் நீங்கள் அடையலாம்: – Accessibility Options, Date and Time, Printers and Faxes, User Accounts என அனைத்தும் இங்கே தனித்தனியாக உள்ளன. அவற்றைக் கிளிக் செய்வதன் மூலம் இவற்றைப் பெற்று குறிப்பிட்ட வகையில் செட் செய்திடலாம்.

கேடகிரி வியூவில் கிடைப்பதைக் காட்டிலும் அதிகமான எண்ணிக்கையில் பிரிவுகளை முதல் தோற்றத்திலேயே பெறலாம். இதுதான் கண்ட்ரோல் பேனலின் மிகப் பழைய தோற்றம். இதற்கு எதிர்மாறாக கேடகிரி வியூ என்பது சுருக்கமான ஒரு விண்டோவினைக் கொடுக்கும். இருந்தாலும் கண்ட்ரோல் பேனல் மூலம் வழக்கமாக எதனை எல்லாம் பெறுகிறீர்களோ அவை அனைத்தையும் இதில் பெறலாம். இதில் என்ன பிரச்னை என்றால் சில கம்ப்யூட்டர் தொழில் நுட்பங்கள் அல்லது வழிகள் குறிப்பிட்ட வியூவில் கண்ட்ரோல் பேனல் இருக்க வேண்டும் என்று எதிர்பார்க் கின்றன. அவ்வாறு இல்லை என்றால் அது சிக்கலில் கொண்டு போய்விட்டுவிடும். இருப்பினும் அது எப்போதாவது ஒரு முறை தான் ஏற்படும்.

அதனால் கம்ப்யூட்டர் பயன்பாட்டிற்கு சிறிதளவும் பாதிப்பினை ஏற்படுத்தாது. மேலும் முதலில் கூறியது போல இந்த இரண்டு வியூக்களுக்கிடையே மாறிக் கொள்வதும் எளிதுதான். இதனை எப்படி மேற்கொள்வது என்பதற்குக் கீழ்க்காணும் வழியைப் பின்பற்றவும். முதலில் Start அழுத்தி, Control Panel செல்லுங்கள். மேலாக இடது மூலையில் பார்க்கவும். இதில் “Switch to Category View” அல்லது “Switch to Classic View” என்பதனைப் பார்க்கலாம். இதில் கிளிக் செய்வதன் மூலம் அடுத்த வியூவிற்கு மாறிக் கொள்ளலாம். மாறிக் கொண்டு கண்ட்ரோல் பேனலில் மேற்கொள்ளும் அனைத்து செயல்பாடுகளையும் இதில் மேற்கொள்ளலாம்.

வீடியோவை ரசிக்கலாமா?

பிராட் பேண்ட் இணைப்பு மற்றும் யு–ட்யூப் இணைய தளம் ஆகியவற்றால் வெப் வீடியோ என்ற இணையதள படக் காட்சிகள் இன்று மக்களிடையே பிரபலமாகி வருகின்றன. இவற்றை எப்படிப் பெற்று ரசிப்பது என்பதனை இங்கு காணலாம்.

யு – ட்யூப் போன்ற வீடியோ காட்சிகளைப் பகிர்ந்து கொள்வதற்கு வழி வகுக்கும் இணைய தளங்கள் மற்றும் அதிவேக பிராட்பேண்ட் இணைப்புகள் போன்ற வசதிகள் கிடைக்கப் பெறத் தொடங்கியதில் இருந்து வெப்சைட்டில் இருந்து வீடியோ காட்சிகளை டவுண் லோட் செய்திடும் பழக்கம் மக்களிடையே அதிகரித்து வருகிறது.

அதே போல தங்களிடையே உள்ள பகிர்ந்து கொள்ளக் கூடிய வீடியோ காட்சிகளை இணையத்தில் பதிப்பதும் அதிகரித்து வருகிறது. வெப் வீடியோ என்று பொதுவாக இவற்றை அழைத் தாலும் மியூசிக் வீடியோஸ், திரைப்படங்கள், கேம்ஸ் ட்ரெய்லர்கள், குறும்படங்கள் ஆகியவை இவற்றின் பல்வேறு பரிமாணங் களாகக் கிடைக் கின்றன. இந்த வீடியோ பைல்களை உங்கள் பிரவுசர் வழியாக ஸ்ட்ரீமிங் செய்திடலாம்; அல்லது டவுண்லோட் செய்து மீடியா பிளேயர் சாப்வேர் புரோகிராம் மூலமாக இயக்கி ரசிக்கலாம்.

ஸ்ட்ரீமிங் / டவுண்லோடிங்:

வெப் சைட் ஒன்றில் அமைக்கப் பட்டுள்ள வீடியோ காட்சியினை உங்கள் பிரவுசர் மூலம் காணலாம். ஒரு பிராட்பேண்ட் இன்டர்நெட் இணைப்பில் இந்த காட்சி உடனடியாக இயங்கத் தொடங்குகிறது. இதற்குக் காரணம் ஸ்ட்ரீமிங் (Streaming) எனப்படும் தொழில் நுட்பமே. இதன் மூலம் வீடியோ பைலிலிருந்து டேட்டா கிடைத்தவுடனேயே அது இயக்கப்பட்டு படக் காட்சி நமக்குக் கிடைக்கிறது. அந்த பைலின் தகவல்கள் அனைத் தும் கம்ப்யூட்டரில் இறங்கு முன்னரே அது நடக்கிறது. நாம் காட்சியைப் பார்த்துக் கொண்டிருக்கையில் மீத டேட்டாவும் இறக்கப்படுகிறது. இந்நிலையில் பிரவுசர் மூடப்படுமானால் அல்லது இன்டர் நெட் தொடர்பு நிறுத்தப்படுமானால் இறங்கியவரை காட்சி கிடைக்கிறது.

மீண்டும் முதலில் இருந்து பார்க்க வேண்டுமானால் அந்த தளத்திற்குச் சென்று படக் காட்சிக்கான தொடர்பில் கிளிக் செய்து காண வேண்டும். ஆனால் இதே வீடியோ காட்சியை, அதன் பைலை, டவுண்லோட் செய்திடுகையில் அந்த பைல் முழுவதுமாக இறக்கப்பட்டு கம்ப்யூட்டரில் சேவ் செய்திடும் வரை காத்திருக்க வேண்டும். அதன் பின்னர் எத்தனை முறை வேண்டுமானாலும் இன்டர்நெட் இணைப்பில்லாமல் பிரவுசரின் துணை இல்லாமல் வீடியோ காட்சியினை மீடியா பிளேயரில் இயக்கிக் காணலாம். பல வெப் சைட்டுகள் நீங்கள் கம்ப்யூட்டரில் சேவ் செய்திட முடியாத ஸ்ட்ரீமிங் வீடியோக்களை மட்டும் இலவசமாகத் தருகின்றன. ஒரு சில வெப்சைட்டுகளே இறக்கிப் பின்னர் காணும் வகையில் பைலை டவுண் லோட் செய்திடும் வசதியைத் தருகின்றன. இது போல டவுண் லோட் செய்திடக் கூடிய வீடியோ பைல்களுக்கு பல இணைய தளங்கள் கட்டணம் வசூலிக்கின்றன.

எங்கு பெறலாம் வீடியோக்களை?

இத்தகைய வீடியோ காட்சிகளை பிரபலப்படுத்தி வெற்றி கண்ட தளம் யு–ட்யூப் ஆகும். இந்த தளத்தில் மற்றவர்களின் வீடியோ காட்சிகளை நீங்கள் காணலாம். அந்த வீடியோக்கள் குறித்த உங்கள் கருத்துக்களைப் பதியலாம். அத்துடன் உங்கள் கருத்துக்களை வெப் கேமரா மூலம் பதிந்து அதே தளத்தில் பதியலாம். இதில் என்ன வகையில் வீடியோ காட்சிகள் உள்ளன என்று தேடுதல் மூலம் தெரிந்து கொள்ளலாம். நகைச்சுவை, பொழுதுபோக்கு, மியூசிக் எனப் பல வகைகளில் இவை உள்ளன. இந்த சொற்களைத் (Comedy, Entertainment மற்றும் Music) தந்து தேடி இவற்றைப் பெறலாம்.

யு–ட்யூப் போன்ற தளங்களில் உள்ள வீடியோ காட்சிகள் நம் பிரவுசரில் பிளாஷ் பிளேயரின் (Flash player) துணையுடன் இயக்கப்படுகின்றன. இவற்றில் முதன்மையானது அடோப் பிளாஷ் பிளேயர். இது அனிமேஷன் படங்களுக்கும் அடிப்படையில் தேவையானது. பெரும்பாலான வெப் சைட்கள் இதன் அடிப்படையிலேயே தங்களின் தளங்களில் அனிமேஷன் படங்கள் மற்றும் வீடியோ காட்சிகளை அமைத்து தருகின்றன. எனவே தான் இந்த தளங்களைக் காண முயற்சிக்கையில் உங்கள் கம்ப்யூட்டரில் பிளாஷ் பிளேயர் இல்லை என்றால் அதனைப் பதிய வேண்டியதின் அவசியத்தை எடுத்துச் சொல்லி பதியவா என்று அந்த தளம் ஒரு டயலாக் பாக்ஸ் மூலம் கேட்கும். சரி என்று ஓகே கொடுத்தால் தான் அது பதியப்பட்டு காட்சிகள் நமக்குக் கிடைக்கும். அடோப் நிறுவனத்தின் லேட்டஸ்ட் பிளாஷ் பிளேயர் தொகுப்பை www.adobe.com/software/flashplayer என்ற முகவரியில் உள்ள தளத்திலிருந்து இறக்குமதி செய்திடலாம்.

யு–ட்யூப் தளத்தில் ஏதாவது ஒரு வீடியோ உங்களின் ஆர்வத்தினைத் தூண்டுவதாக இருந்தால் அந்த தொடர்பில் கிளிக் செய்திட வேண்டும். உடனே நீங்கள் இன்னொரு தளத்திற்கு எடுத்துச் செல்லப்பட்டு அங்கு வீடியோ தானாகவே இயக்கப்படுவதனைக் காணலாம். இந்தக் காட்சியினை நீங்கள் கண்டு மகிழ்வது மட்டுமின்றி அதனை ரேட்டிங் என்ற முறையில் மதிப்பிடலாம். உங்கள் கருத்துக்களையும் பதியலாம். இவ்வகையில் யு–ட்யூப் தளம் மிகவும் பிரபலமான தளம் என்றாலும் வேறு சில தளங்களும் இத்தகைய வீடியோக்களைத் தருகின்றன.

திரைப் படங்களின் ட்ரெய்லர் படங்களைப் பார்ப்பதில் உங்களுக்கு ஆர்வம் இருந்தால் www.apple.com/trailers என்ற முகவரியில் உள்ள தளத்திற்குச் செல்லவும். மூவி ட்ரெய்லர்கள் பெரும்பாலும் QuickTime என்ற movie (or mov) பார்மட்டைப் பின்பற்று கின்றன. எனவே இத்தகைய வெப் சைட்டுகளுக்குச் செல்கையில் குயிக் டைம் சாப்ட்வேர் தொகுப் பினை டவுண்லோட் செய்து இன்ஸ்டால் செய்திடவா என்ற செய்தி காட்டப்படும்.

ஆப்பிள் நிறுவனம் இவ்வகையில் iTunes என்ற சாப்ட்வேர் தொகுப்பினைத் தருகிறது. இதன் மூலம் டிவி ஷோ, வீடியோ காட்சி, ட்ரெய்லர் காட்சி என அனைத்தையும் பார்க்க முடியும். அத்துடன் இவற்றை உங்கள் ஐ–பாட் சாதனத்துடன் ஒருங்கிணைத்து அவற்றை ஐ–பாடிலும் பார்க்கலாம்.

ஸ்ட்ரீமிங் வீடியோக்களின் தன்மை: இணைய தளங்களில் வீடியோ காட்சிகளைப் பார்க்கையில் அவற்றின் தன்மை நாம் வீடுகளில் டிவிடி மூலம்மோ அல்லது டவுண்லோட் செய்த வீடியோவினப் பார்ப்பது போலவோ இருக்காது. ஏனென்றால் உங்கள் கம்ப்யூட்டருக்கு இந்த வீடியோ காட்சியை உடனுடக்குடன் அனுப்ப பைலின் அளவை சிறியதாக அமைக்க வேண்டும். இதனால் ஆன் லைனில் நாம் பார்க்கும் வீடியோ காட்சிகளின் தன்மை குறைவாகவும் காட்சி சிறியதாகவும் கிடைக்கிறது. இருப்பினும் சில தளங்களில் இந்த காட்சிகள் சிறியதாக, நடுத்தரமாக அல்லது பெரியதாக திரை முழு வதும் வேண்டுமா எனக் கேட்டு அதற்கேற்ப காட்டப்படும்.

இதிலும் படத்தின் தன்மை மிகச் சிறப்பாக இருக்கும் என உறுதி சொல்ல முடியாது. ஆன்லைனில் வீடியோ காட்சிகளைக் காண்கையில் சில நேரம் படம் அப்படியே உறைந்து நின்று பின் மீண்டும் தொடரும். இதற்குக் காரணம் படக் காட்சி தொடங்கிய பின்னர் தொடர்ந்து காட்டுவதற்கு டேட்டா இல்லாமல் இறங்கிக் கொண்டிருக்கும். காட்டுவதற்கான அளவில் டேட்டா கிடைத்தவுடன் இது தொடரும். இன்டர்நெட் இணைப்பின் வேகம் குறைவாக இருந்தால் இது போல அடிக்கடி நடைபெறும்.

இது போல காட்சிகளைக் காண்கையில் டேட்டா எந்த அளவிற்கு இறங்கியுள்ளது என்பதனையும் படம் எந்த அளவில் காட்டப்பட்டுக் கொண்டிருக்கிறது என்பதனையும் இரு நீள கோடுகள் மூலமாகக் காணலாம். இந்த நீள பார்களில் கிளிக் செய்து வீடியோவினை பார்வேர்ட் செய்தும் பார்க்கலாம். இத்தகைய ஸ்ட்ரீமிங் வீடியோவினை கம்ப்யூட்டரில் காப்பி செய்வது பெரும்பாலும் தடை செய்யப்பட்டிருக்கும் என்றாலும் இதனையும் காப்பி செய்திட சில சாப்ட்வேர் புரோகிராம்கள் இன்டர்நெட்டில் கிடைக்கின்றன.

நீங்கள் பயர்பாக்ஸ் பிரவுசரைப் பயன்படுத்தினால் இணையப் பக்கங்களில் பதியப்பட்டுள்ள வீடியோ கிளிப்களை உங்கள் கம்ப்யூட்டரில் பதிந்து கொள்ள வசதி தரப்பட்டிருப்பதனைப் பார்க்கலாம். இந்த வீடியோ படங்கள் மீது ரைட் கிளிக் செய்து அதில் பிரிவைத் தேர்ந்தெடுத்துப் பின் மீடியா என்ற டேப்பில் என்டர் செய்திட வேண்டும். பின்னர் நாம் சேவ் செய்ய விரும்பும் வீடியோ பைலைத் தேர்ந்தெடுத்து சேவ் செய்திடலாம்.

டவுண்லோட் வீடியோவினை பார்க்க: கம்ப்யூட்டரில் சேவ் செய்த வீடியோ பைலை இயக்கிப் பார்க்க உங்கள் கம்ப்யூட்டரில் விண்டோஸ் மீடியா பிளேயர், விண் ஆம்ப் அல்லது மீடியா பிளேயர் கிளாசிக் போன்ற சாப்ட்வேர் புரோகிராம்கள் பதியப்பட்டிருக்க வேண்டும். வீடியோ பைலை இயக்க விண்டோஸ் மீடியா பிளேயரை இயக்கிப் பின் பைல் மெனு சென்று வீடியோ பைல் இருக்கும் இடத்திற்குச் சென்று பைலை கிளிக் செய்திடலாம். இந்த பிளேயரையே இது போன்ற வீடியோ பைல்களை இயக்கும் டிபால்ட் புரோகிராமாக மாற்றிவிட்டால் எப்போது வீடியோ பைலின் மீது கிளிக் செய்தாலும் விண்டோஸ் மீடியா பிளேயர் இயக்கப்பட்டு வீடியோ பைல் காட்சி காட்டப்படும். வீடியோ பைல்கள் avi, mov, wmv, mpg மற்றும் mpeg போன்ற பலவகை பார்மட்டுகளில் வருகின்றன. ஒரு சில பார்மட்டுகளை குறிப்பிட்ட ஒரு சில மீடியா பிளேயர்கள் இயக்காது. அப்போது வேறு மீடியா பிளேயர்களை நாட வேண்டும்.

வீடியோ ஷேரிங்: யு–ட்யூப் இணையதளம் பிரபலமானதற்குக் காரணம் அதில் வீடியோ பைல்களை அனைவரும் பகிர்ந்து கொள்ள வசதி அளித்ததுதான். வெப்கேம், கேம்கார்டர் மற்றும் மொபைல் போனில் எடுக்கப்பட்ட படக் காட்சிகள் எல்லாம் இதில் பதியப்பட்டு பகிர்ந்து பார்த்து ரசிக்கப்படுகின்றன. இதிலும் சிலர் அனுமதி பெறாத வீடியோ காட்சிகளையும் பாலியியல் காட்சிகளையும் தளங்களில் போட்டு சட்ட பிரச்னைகளை ஏற்படுத்துவதால் யு–ட்யூப் நிறுவனம் பல்வேறு வழிகளைக் கையாண்டு அவற்றை நீக்கி வருகிறது.

முன்பு இது போன்ற தளங்களில் காட்சிகளை அமைப்பதற்கு எதிர்ப்பு தெரிவித்து வந்த பட நிறுவனங்கள் பல தற்போது தங்கள் படங்களின் ட்ரெய்லர் காட்சிகளையும் முழு நேர மூவிகளையும் அமைக்க ஒத்துக் கொண்டு தாங்களாகவே படங்களைப் பதித்து வைக்கின்றன. இந்தியாவிலும் இது பழக்கத்திற்கு வந்தால் கட்டணம் செலுத்தி படங்களை டவுண்லோட் செய்து பார்க்கலாம். அல்லது இலவசமாகவும் பார்க்கலாம்.

எக்ஸெல் டிப்ஸ்... டிப்ஸ்...

உங்கள் எக்ஸெல் ஒர்க் புக்கில் குழப்பமான வகையில் பார்முலாக்களைப் பயன்படுத்துகிறீர்களா? அதாவது ஒரு பார்முலாவின் முடிவை ஒரு செல்லுக்குக் கொண்டு சென்று பின் அந்த முடிவினை இன்னொரு பார்முலாவில் பயன்படுத்தும் வகையில் பார்முலா எழுதிப் பின் அந்த முடிவினையும் இதே போல இன்னொரு பார்முலாவில் இணைத்து என சிலந்தி வலை போல பார்முலாக்களை இணைக் கிறீர்களா! இதனால் சில வேளைகளில் பல இடியாப்பச் சிக்கல் ஏற்பட வாய்ப்புண்டு.

ஏதேனும் ஒரு செல்லில் டேட்டாவினைத் தவறாக அமைத்துவிட்டால் தவறு எங்கே ஏற்படுகிறது என்று நாம் கண்டறிய முடியாது. எந்த செல்லில் உள்ள பார்முலா இந்த தவறான தகவலைத் தருகிறது என்று எப்படி அறிந்து கொள்வது? எந்த எந்த செல் பார்முலா இதில் இணைந்து ள்ளது என நாம் ஒரு காட்சியாகவே காணும் வாய்ப்பினை எக்ஸெல் தருகிறது. இதற்கு ஒரு சில சரியான பட்டன்களைக் கிளிக் செய்தால் போதும். இதற்கு View மெனு சென்று அதில் Toolbars என்னும் மெனுவினைப் பெறவும்.

அதில் உள்ள பிரிவுகளில் Formula Auditing என்னும் பிரிவினைத் தேர்ந்தெடுக்கவும். இப்போது எக்ஸெல் பார்முலாக்களை எப்படி இணைத்துள்ளது என்பதனை நமக்குக் காட்டுமாறு செய்திடும் வழிகளை மேற்கொள்ள வேண்டும். இதற்கு Trace Precedents என்னும் பட்டனில் கிளிக் செய்திடவும். இது இடதுபுறத்தில் இரண்டாவது பட்டனாக இருக்கும். இப்போது நீங்கள் தேர்ந்தெடுத்துள்ள செல்லுக்கு எந்த எந்த செல் பார்முலாக்கள் முடிவினை அளிக்கின்றன என்பது அம்புக்குறிகளால் காட்டப்படும்.

அடுத்து அதே பட்டனை இரண்டாவது முறையாகக் கிளிக் செய்திடவும். இப்போது Remove Precedent Arrows என்று உள்ள பட்டனில் கிளிக் செய்தால் எவ்வகையான தொடர்பில் பார்முலாக்கள் உள்ளனவோ அவ்வரிசையில் ஒவ்வொன்றாக அம்புக்குறிகள் மறையும். ஒவ்வொரு முறை கிளிக் செய்திடுகையில் ஒரு அம்புக் குறி மறையும். இதிலிருந்து எந்த செல் பார்முலாவிலிருந்து நாம் தேர்ந்தெடுத்த செல்லிற்கு டேட்டா வந்தது என அறியலாம். அடுத்தபடியாக உள்ள Trace Dependents என்ற பட்டனை அழுத்தினால் நீங்கள் தேர்ந்தெடுத்த செல்லில் உள்ள மதிப்பை அடிப்படியாகக் கொண்டு எந்த எந்த செல்களுக்கான பார்முலாக்கள் செயல்படுகின்றன என்பதனை யும் காணலாம்.

எனவே இங்கு குறிப்பிட்ட செல்லுக்கு எப்படி மதிப்பு வருகிறது என்பதற்கு மாறாக இந்த செல்லின் மதிப்பு எந்த எந்த செல்லின் மதிப்பை மாற்றுகிறது என அறியலாம். இந்த தடங்கள் அனைத்தையும் தோற்றத்திலிருந்து எடுத்துவிட Remove Dependent Arrows button என்ற பட்டனை கிளிக் செய்திடவும். இதற்குப் பதிலாக Remove All Arrows button என்ற பட்டனையும் கிளிக் செய்திடலாம். இந்த வழிகள் நமக்கு நாம் அமைத்த பார்முலாக்கள் சரியாகச் செயல்படுகின்றனவா என்று காட்சி வடிவில் காட்டுவது நாம் தவறு ஏதேனும் செய்திருந்தால் திருத்திக் கொள்ள உதவும்.

வேர்ட் : டெக்ஸ்ட்டுக்கு மட்டுமல்ல

வேர்டில் சொற்களை மட்டுமின்றி படங்களையும் கிராபிக்ஸ் உருவங்களையும் கையாளலாம். டெக்ஸ்ட் மட்டுமே உள்ள டாகுமெண்ட் அல்லாமல் படங்கள் நிறைந்த டாகுமெண்டரியும் உருவாக்கலாம். எளிதாக நிறைவேற்ற வேர்ட் தொகுப்பு பல வசதிகளைத் தந்துள்ளது.


இந்த தொகுப்பில் படங்களையும் அழகாக அமைத்து டாகுமெண்ட்டுகளை உருவாக்கலாம். அது குறித்து இங்கு காண்போம். வேர்டில் சொற்களை மட்டுமின்றி படங்களையும் கிராபிக்ஸ் உருவங்களையும் கையாளலாம். டெக்ஸ்ட் மட்டுமே உள்ள டாகுமெண்ட் அல்லாமல் படங்கள் நிறைந்த டாகுமெண்டரியும் உருவாக்கலாம். இதனை எளிதாக நிறைவேற்ற வேர்ட் தொகுப்பு பல வசதிகளைத் தந்துள்ளது. இதனை மிகவும் எளிதாக மாற்றுவது நீங்கள் இந்த வசதிகளைப் புரிந்து கொண்டு உங்கள் கைப் பழக்கத்தில் கொண்டு வருவதில்தான் உள்ளது. இவற்றை ஒவ்வொன்றாகப் பார்க்கலாம்


கிளிப் ஆர்ட் (Clipart) : டாகுமெண்ட்களில் பயன்படுத்துவதற்காக இமேஜஸ் என்னும் படங்கள் கொண்ட லைப்ரேரி இது. வேர்டில் Insert மெனு சென்று அதில் கிடைக்கும் Picture மெனுவில் Clipart ஐப் பெறலாம். நீங்கள் வேர்ட் 2000 மற்றும் அதற்கு முந்தைய பதிப்புகளைப் பயன்படுத்துபவராயிருந்தால் கிளிப் ஆர்ட் டயலாக் பாக்ஸ் பெறலாம். அதற்குப் பிந்தைய பதிப்புகளில் வலது பக்கம் கிளிப் ஆர்ட் சைட் பார் கிடைக்கும். கிளிப் ஆர்ட் லைப்ரேரியில் உள்ள படங்கள் அனைத்தும் கேடகிரி என்னும் வகையில் பிரித்து வைக்கப்பட்டுள்ளன. இது படங்களைத் தேடி எடுக்க உதவுகிறது.

இதில் உள்ள டெக்ஸ்ட் பாக்ஸில் நீங்கள் விரும்பும் படத்தின் தீம் அல்லது அது குறித்த ஒரு சொல்லை டைப் செய்து என்டர் செய்தால் உடன் நீங்கள் குறிப்பிட்ட பொருள் குறித்த அனைத்து படங்களும் காட்டப்படும். வேர்ட் டாகுமெண்ட் ஒன்றில் இந்த படங்களைப் பயன்படுத்த எந்த படத்தை தேர்ந்தெடுக்க விரும்புகிறீர்களோ அந்த கட்டத்தில் வலது ஓரத்தில் காணப்படும் அம்புக் குறியில் கிளிக் செய்தால் சிறிய மெனு ஒன்று விரியும். இதில் படத்தைக் காப்பி செய்வதற்கும் அப்படியே டாகுமெண்ட்டில் இடைச்செருகலாக அமைப்பதற்கும் இன்னும் பல செயல்பாடுகளுக்குமான கட்டளைச் சொற்கள் இருக்கும். தேவையானதைக் கிளிக் செய்திடலாம்.

இங்கு நீங்கள் எதிர்பார்த்த படம் கிடைக்கவில்லை என்றால் ‘Clip art on Office Online’ என்பதில் கிளிக் செய்தால் மைக்ரோசாப்ட் நிறுவனத் தளத்தில் உள்ள படங்களை இலவசமாகப் பெறலாம். இந்த படங்களைப் பெற இணையத் தொடர்பில் நீங்கள் இருக்க வேண்டும். அங்கு படங்களைத் தேர்ந்தெடுத்தால் அவை தானாகவே உங்கள் கம்ப்யூட்டரில் உள்ள கிளிப் ஆர்ட் பிரிவில் சேர்க்கப்படும்.

படத்தைத் தேர்ந்தெடுத்து அதனை வேர்ட் டாகுமெண்ட்டில் கொண்டு சென்றால் அந்த படத்தினை எடிட் செய்திட வேர்ட் பல வசதிகளைத் தருகிறது. படத்தின் நடுவே கிளிக் செய்து அதனை வேர்ட் டாகுமெண்ட்டின் எந்த இடத்திற்கும் இழுத்துச் செல்லலாம். நான்கு பக்கமும் கிடைக்கும் ஹேண்டில்களை மவுஸ் கர்சரால் இழுத்து படத்தின் அளவை குறைக்கவும் அதிகப்படுத்தவும் செய்திடலாம். படத்தில் இருமுறை கிளிக் செய்திடுகையில் வேர்ட் பிக்சர் டூல் பார் என்னும் வசதியையும் தருகிறது. இதன் மூலமும் நாம் படத்தை ஒழுங்கு செய்து அமைக்கலாம். படத்தின் ஒரு பகுதி வேண்டும் என்று திட்டமிட்டால் அப்படியே அதனை மட்டும் கட் செய்து அமைக்கலாம்.

போட்டோ மற்றும் படம்: கிளிப் ஆர்ட் படங்களே வேண்டாம் என்று எண்ணினால் நீங்கள் வரைந்த படம், ஸ்கேன் செய்த படம் அல்லது போட்டோ என எந்த பிக்சர் பைலையும் வேர்ட் டாகுமெண்ட்டில் இணைக்கலாம். ஏற்கனவே சொல்லப்பட்ட பிக்சர் மெனுவில் From File என்ற பிரிவில் கிளிக் செய்து பட பைல்களைக் கொண்டு வரலாம். இதனைக் கிளிக் செய்தால் கிடைக்கும் விண்டோவில் பிரவுசிங் ஆப்ஷன் பெற்று கம்ப்யூட்டர் ஹார்ட் டிஸ்க்கில் எங்கு நீங்கள் விரும்பும் படம் அல்லது போட்டோ பைல் உள்ளதோ அதனை செலக்ட் செய்து இணைக்கலாம்.

இவ்வாறு இணைக்கப்பட்ட படங்களுக்கு தலைப்புகள் கொடுக்க வேண்டுமா? இன்ஸெர்ட் மெனுவில் டெக்ஸ்ட் பாக்ஸ் ஆப்ஷனைப் பயன்படுத்தி தலைப்பை டைப் செய்திடலாம். டெக்ஸ்ட் பாக்ஸ் ஆப்ஷனைத் தேர்ந்தெடுத்தவுடன் கர்சர் சிறிய கிராஸ் ஹேர் ஐகானாக மாறும். அதைக் கொண்டு டெக்ஸ்ட் பாக்ஸ் கட்டத்தை அமைத்து பின் உள்ளே டைப் செய்திடலாம். இந்த டெக்ஸ்ட் பாக்ஸை எந்த இடத்திற்கும் நகர்த்தி அமைக்கலாம். இந்த டெக்ஸ்ட் பாக்ஸையும் மிகவும் கவர்ச்சிகரமாக வண்ணத்திலும் பல வகை எபெக்டிலும் அமைக்கலாம்.

ஷேப்கள் என்னும் படங்கள்: இன்ஸெர்ட் கொடுத்து பிக்சர் மெனு செல்கையில் கிடைக்கும் இன்னொரு பிரிவு Autoshapes ஆகும். நட்சத்திரம், இதயம், சதுரம், நீள் சதுரம், வட்டம், பலவகையான அம்புக்குறி என பல ஷேப்களை வேர்ட் டாகுமெண்ட்டில் இணைக்கலாம். Insert, Picture, Autoshapes என வரிசையாகத் தேர்ந்தெடுத்த பின் ஆட்டோ ஷேப் டூல் பார் திரையில் காட்டப்படும். இந்த ஷேப்கள் ஆறு வகைகளாகப் பிரிக்கப்பட்டுள்ளதைப் பார்க்கலாம். ஏதேனும் ஒரு பட்டனில் கிளிக் செய்து ஒரு ஷேப்பைத் தேர்ந்தெடுக்கலாம். இதன் மீது மவுஸ் கர்சரால் அழுத்திப் பிடித்தவாறே இழுத்து வேர்ட் டாகுமெண்ட்டில் விட்டு விடலாம்.

பின் முன்பு கூறியபடி இதன் மீது கிளிக் செய்து பிக்சர் டூல் பார் மூலம் இதன் அகலம், உயரத்தை மாற்றலாம். ஷேப்பையும் மாற்றலாம். ஷேப் மீது ரைட் கிளிக் செய்தால் Format Autoshape என்ற டூல் பார் கிடைக்கும். இதன் மூலம் ஷேப்பினை எடிட் செய்திடலாம். இந்த டூல் பாரின் இடது ஓரத்தில் பிடித்து இழுத்து இதனை டாகுமெண்ட்டில் எந்த இடத்தில் வேண்டும் என்றாலும் நமக்கு வசதியாக இருக்க வைக்கலாம்.

வேர்ட் ஆர்ட்: படங்களைக் கையாள்வதில் நான்காவதாக நமக்குக் கிடைக்கும் பிரிவு வேர்ட் ஆர்ட் ஆகும். Insert, Picture சென்று Wordart Gallery ஐப் பெறலாம். இதில் பல்வேறு வகையிலான டெக்ஸ்ட் ஸ்டைல் கிடைக்கும். உங்களுக்குப் பிடித்த டெக்ஸ்ட் ஸ்டைல் தேர்ந்தெடுத்து பின் கிடைக்கும் கட்டத்தில் டெக்ஸ்ட் அமைக்கலாம். தேர்ந்தெடுத்த ஸ்டைலில் டெக்ஸ்ட் உருவாகும். பின் இதனையும் அளவு மற்றும் பிற பரிமாணங்களை மாற்றி இழுத்துச் சென்று நீங்கள் விரும்பும் இடத்தில் அமைக்கலாம்.

மேலே குறிப்பிட்டவை தவிர மேலும் சில வழிகளில் படங்களை வேர்ட் தொகுப்பிற்குள் கொண்டு வரலாம். டிஜிட்டல் கேமராவினை இணைத்து அதில் எடுத்த படங்களைக் கொண்டு வரலாம். அல்லது ஸ்கேனரில் ஸ்கேன் செய்த படங்களையும் இணைக்கலாம். பல வெப் சைட்டுகளில் கிளிப் ஆர்ட் படங்கள் ஆயிரக்கணக்கில் கிடைக்கின்றன. இவற்றில் இருந்தும் தேடி எடுத்து கம்ப்யூட்டரில் பதிந்து வைத்தும் பயன்படுத்தலாம். இனி நீங்கள் உருவாக்கும் வேர்ட் டாகுமெண்ட்களில் நிறைய படங்களை எதிர்பார்க்கலாமா? முதலில் உங்கள் படத்தை அமைத்துப் பார்த்து மகிழ்ச்சி கொள்ளுங்கள்.

பிடித்த காட்சியை வால்பேப்பராக மாற்றுவது எப்படி?

Irfanview என்ற புகழ் பெற்ற இலவச சாப்ட்வேரை www.irfanview.com தளத்தில் இருந்து டவுன்லோடு செய்து உங்கள் கம்ப்யூட்டரில் நிறுவிக் கொள்ளுங்கள்.இர்பான்வியூ மூலம் சிடி டிஸ்க்கில் உள்ள வீடியோ பைலைத் (.AVI, .MPG போன்ற எக்ஸ்டென்ஷன்கள் கொண்டவை) திறந்து வீடியோவை ஓட விடுங்கள். option > capture கட்டளையைக் கிளிக் செய்யுங்கள். Capture Area என்பதில் உங்களுக்கு வேண்டிய பகுதிக்கான ரேடியோ பட்டனை கிளிக் செய்யுங்கள். Capture Method என்பதில் Hot Key என்ற ரேடியோ பட்டன் தேர்வாகி அதில் ctrl+F11 கீகள் தெரியும். அது அப்படியே இருக்கட்டும். Start பட்டனை அழுத்துங்கள்.

வீடியோவில் உங்களுக்கு பிடித்த காட்சி வந்தவுடன் Ctrl+F11 கீகளை அழுத்துங்கள். அந்த காட்சி ஒரு .BMP பைலாக C:\Temp போல்டரில் சேமிக்கப்பட்டிருக்கும். நமது இர்பான்வியூவில் உட்கார்ந்து கொண்டே File=>open கட்டளையைக் கொடுத்து C:\Temp போல்டரில் சேமிக்கப்பட்டுள்ள அந்த பைலைத் திறந்து கொள்ளுங்கள். (படத்தில் தேவையற்றவை தெரிந்தால் அவற்றை விட்டுவிட்டு மீதமுள்ளவற்றை தேர்வு செய்து மற்றொரு .BMP பைலாக இர்பான்வியூவில் சேமியுங்கள்; பின்பு அதைத் திறந்து கொள்ளுங்கள்).

இர்பான்வியூவில் அந்த காட்சி தெரிகிறதல்லவா? Options=>Set as Wallpaper கட்டளையை கிளிக் செய்தால் centered, tiled மற்றும் Streteched என மூன்று கட்டளைகள் தெரியும். வேண்டியதைக் கிளிக் செய்யுங்கள். நீங்கள் விரும்பிய வால்பேப்பர் கிடைக்கும்.

டிஸ்பிளே செட்டிங்ஸ் மாற்றுங்கள்

கம்ப்யூட்டரில் சில விண்டோக்களில் உள்ள டெக்ஸ்ட்டைப் படித்துப் பார்க்கையில் கண்களை இறுக்கிக் கொண்டு படிக்கிறீர்களா? ஏன் இந்த சிரமம்? மானிட்டரில் தெரியும் கம்ப்யூட்டர் விண்டோக்களை நம் வசதிக்கேற்றபடி அமைக்கலாமே! டெக்ஸ்ட் அளவு மட்டுமின்றி வண்ணக் கலவைகளையும் கண்களை உறுத்தாத படி அமைக்கலாம். டெஸ்க்டாப்பில் தெரியும் படம், வீடியோ காட்சிகள் மற்றும் விளையாடும் போது தோற்றங்கள் ஆகியவற்றை நமக்கு ஏற்றபடி மாற்றலாம்.

இதைத்தான் டிஸ்பிளே செட்டிங்ஸ் (display settings) என அழைக்கிறார்கள். இது குறித்து இங்கே காணலாம். டிஸ்பிளே செட்டிங்ஸ் மாற்றி அமைப்பதற்கான விண்டோவினை டெஸ்க்டாப்பில் ஏதாவது ஒரு காலியான இடத்தில் ரைட் கிளிக் செய்து கிடைக்கும் மெனுவில் Properties தேர்ந்தெடுத்து பெறலாம். இதனையே கண்ட்ரோல் பேனல் (Control Panel) சென்று அங்கு Appearance and Themes பிரிவில் display கிளிக் செய்து பெறலாம்.

இவ்வாறு செல்கையில் Display Properties என்னும் விண்டோ கிடைக்கும். இதில் செட்டிங்ஸ் அமைக்க Themes, Desktop, Screen Saver, Appearance மற்றும் Settings என்னும் ஐந்து பிரிவுகள் தரப்பட்டிருக்கும். இதில் எந்த பிரிவில் மாற்றங்களை ஏற்படுத்தினாலும் Apply அல்லது OK என ஏதாவது ஒன்றில் அல்லது இரண்டிலும் கிளிக் செய்து வெளியேற வேண்டும்.

தீம்ஸ் (Themes) : தீம் என்பது ஸ்கிரீன் பின்னணி. அத்துடன் சவுண்ட் அரேன்ஞ்மென்ட் மற்றும் ஐகான் அமைப்பு ஆகிய அனைத்தையும் உள்ளடக்கியதாகும். இந்த பிரிவில் உங்களுடைய கம்ப்யூட்டரில் தோன்றும் அனைத்து விண்டோவிற்கான வண்ணங்கள், ஐகான்கள் மற்றும் ஒலி வகை ஆகியவற்றைத் தேர்ந்தெடுக்கலாம்.

டெஸ்க்டாப் (Desktop) : இந்த பிரிவினைத் தேர்ந்தெடுத்து டெஸ்க்டாப்பிற்கான பேக்ரவுண்ட் எனப்படும் பின்னணியில் தெரியும் படத்தை அமைக்கலாம். அந்த விண்டோவில் கொடுத்துள்ள படங்களிலிருந்து ஒன்றைத் தேர்ந்தெடுக்கலாம்.

அல்லது ஆன்லைனில் சென்று ஏதேனும் படம் ஒன்றை எடுத்து அமைக்கலாம். கம்ப்யூட்டரில் உள்ள படங்களையும் பேக்ரவுண்ட் படமாக அமைக்கலாம். அது உங்கள் போட்டோவாகவோ அல்லது கார்ட்டூன் கேலிச் சித்திரமாகவோ இருக்கலாம். இந்த விண்டோ மட்டுமின்றி இத்தகைய பட பைல்கள் அல்லது இன்டர்நெட்டில் பிரவுஸ் செய்கையில் உங்கள் மனதைக் கவரும் படங்கள் ஆகியவற்றில் ரைட் கிளிக் செய்தால் கிடைக்கும் மெனுவில் என்பதில் Set as Desktop Background கிளிக் செய்தும் பேக்ரவுண்டை அமைக்கலாம்.

Desktop Items என்ற விண்டோவினைப் பெற இங்கு Customize Desktop என்பதில் கிளிக் செய்திடவும். இதில் General மற்றும் Web என இரண்டு பிரிவுகள் கிடைக்கும். இதில் General பிரிவில் எந்த ஷார்ட் கட் ஐகான்கள் டெஸ்க்டாப்பில் காட்டப்பட வேண்டும் என்பதனை நீங்கள் முடிவு செய்திடலாம். அல்லது Desktop cleanup என்னும் வசதியைப் பயன்படுத்தி அடிக்கடி பயன்படுத்தாத ஷார்ட்கட் ஐகான்களை எடுத்துவிடலாம்.

இந்த ஷார்ட் கட் ஐகான்களை எடுப்பதனால் அவை இயக்கிக் கொண்டு வரும் புரோகிராம்களுக்கு எந்த பாதிப்பு வராது. புரோகிராம்களுக்கான குறுக்கு வழிகளை எடுக்கிறோம், அவ்வளவுதான். அடுத்ததாக Screen Saver என்னும் பிரிவு. இந்த பிரிவில் ஸ்கிரீன் சேவராக எந்த காட்சி வர வேண்டும் என்பதனை நீங்கள் முடிவு செய்திடலாம். அல்லது நீங்களே ஒரு காட்சியை உருவாக்கி பயன்படுத்தலாம்.

நீங்கள் கம்ப்யூட்டரில் எந்த வேலையையும் குறிப்பிட்ட காலத்தில் (நிமிடங்கள்) இயக்காமல் இருந்தால் ஸ்கிரீன் சேவர் இயக்கப்பட்டு காட்சி அளிக்கும். இணையத்தில் அழகான பல ஸ்கிரீன் சேவர்கள் கிடைக்கின்றன.

ஆனால் இவை நம்பகமான தளங்களில் உள்ளனவா என்று பார்த்து இறக்கிப் பயன்படுத்த வேண்டும். ஏனென்றால் இப்படிப்பட்ட அழகான ஸ்கிரீன் சேவர்களுடன் வைரஸ் அல்லது உங்கள் பெர்சனல் தகவல்களைத் திருடும் பிஷிங் புரோகிராம்களும் உங்கள் கம்ப்யூட்டரில் இறங்கிவிடும். விண்டோஸ் புரோகிராமிலேயே உள்ள ஸ்கிரீன் சேவர்களைப் பயன்படுத்துவதே நல்லது. பட்டியலில் ஏதாவது ஒன்றைத் தேர்ந்தெடுத்தால் அது எப்படி தோற்றமளிக்கும் என முன்காட்சியாகக் காட்டப்படும்.

அதனைப் பார்த்து உங்களுக்குப் பிடித்தால் அதனையே தேர்ந்தெடுத்து அமைக்கலாம். ஸ்கிரீன் சேவரே தேவையில்லை என்றாலும் அதற்கான பிரிவைத் தேர்ந்தெடுத்து அமைத்து வெளியேறலாம். இதே விண்டோவில் Power settings என்ற பிரிவில் நீங்கள் கம்ப்யூட்டரை குறிப்பிட்ட நேரம் பயன்படுத்தாமல் இருந்தால் மானிட்டருக்கு வரும் மின் சப்ளையை நிறுத்தவும் பின் நீங்கள் இயங்கத் தொடங்கியவுடன் இயக்கவும் செட் செய்திடலாம்.

அப்பியரன்ஸ் (Appearance) : இந்த பிரிவுதான் உங்கள் டெஸ்க்டாப்பின் மிடுக்கான தோற்றத்தினை செட் செய்திடும் பிரிவாகும். இதில் விண்டோவின் ஸ்டைல் மற்றும் கலரை செட் செய்திடலாம். விண்டோவில் காட்டப்படும் பட்டன்கள் மற்றும் எழுத்துக்களின் அளவினை செட் செய்திடலாம். இந்த பிரிவில் கிடைக்கும் கீழாகச் செல்லும் அம்புக் குறியினை அழுத்தி பல்வேறு செட்டிங்குகளைப் பார்க்கலாம்.

அதில் எது உங்களுக்கு விருப்பமாக உள்ளதோ அதனைத் தேர்ந்தெடுத்தால் அது எப்படி தோற்றமளிக்கும் என்பது அருகில் கட்டத்தில் காட்டப்படும். அது பிடித்துப் போனால் அதனைத் தேர்ந்தெடுத்து செட் செய்து ஓகே கிளிக் செய்து வெளியேறவும். எழுத்தின் அளவு (Font size) என்பது பலருக்கும் பயன்படும் ஒரு வசதி. விண்டோவில் காட்டப்படும் எழுத்தின் அளவு சிறியதாக இருப்பதாக நீங்கள் உணர்ந்தால் இன்னும் சற்று பெரியதாக இருக்க வேண்டும் என எண்ணினால் இதனை மாற்றி செட் செய்திடலாம். இன்னும் கூடுதலாக இரண்டு வகைகள் உண்டு.

அவை: Large Fonts மற்றும் Extra Large Fonts. இன்னும் பல மாற்றங்களை இதில் மேற்கொள்ளலாம். Advanced என்ற பிரிவைத் தேர்ந்தெடுத்து விண்டோ, அதன் பார்டர், ஐகான் அளவு மற்றும் மெனுக்கள் எப்படித் தோன்ற வேண்டும் என்பதனை செட் செய்திடலாம்.

செட்டிங்ஸ் (Settings) : இந்த டேப் தரும் பிரிவில் ஸ்க்ரீன் ரெசல்யூசன் மற்றும் கலரின் தன்மையை செட் செய்திடலாம். ரெசல்யூசன் என்பது திரையில் எத்தனை பிக்ஸெல்களில் வண்ணம் தரப்பட வேண்டும் என்பதாகும். எந்த அளவிற்கு அதிகமாக ரெசல்யூசனில் இதனை செட் செய்கிறோமோ அந்த அளவிற்கு திரையின் தோற்றம் தெளிவாகக் கிடைக்கும். கூடுதலான ரெசல்யூசன் உங்களுக்கு அதிக அளவில் திரை இடத்தைக் கொடுக்கும். ஆனால் இதனால் டெக்ஸ்ட் மற்றும் ஐகான் மிகச் சிறியதாக இருக்கலாம். எனவே எழுத்துவகையினைப் பெரிதாக்கி ஐகான்களையும் பெரியதாக அமைக்கலாம்.

உங்களுடைய மானிட்டரில் எந்த அளவிற்கு ரெசல்யூசனை கூடுதலாக வைக்க முடியுமோ அந்த அளவிற்கு மட்டுமே வைக்க முடியும். பல ரெசல்யூசன்களில் வைத்து சோதனை செய்து பார்த்து எது உங்களுக்கு நிறைவாக இருக்கிறதோ அந்த அளவில் வைத்துக் கொள்ளலாம். Color quality ஆப்ஷன் எப்போதும் Highest (32 bit) என்ற அளவில் வைக்கப்பட வேண்டும். உங்களுக்கு டிஸ்பிளே பிரச்னைகள் இருந்தால் Troubleshoot என்ற பிரிவில் கிளிக் செய்திடவும். அங்கு தீர்வுகள் கிடைக்கும். இதே விண்டோவில் இருக்கும் Advanced பட்டனில் கிளிக் செய்திடவும். இப்போது General, Adapter, Monitor, Troubleshoot, Color Management என்ற டேப்களுடன் விண்டோ ஒன்று காட்டப்படும்.

General: கூடுதலான ரெசல்யூசனில் திரைக் காட்சி அளவை செட் செய்திருந்தால் இங்கு உள்ள DPI (dots per inch) செட்டிங்ஸ் மூலம் டெக்ஸ்ட் உட்பட அனைத்து ஸ்கிரீன் சமாச்சாரங்களையும் பெரிதாகக் காட்டலாம்.

Adapter: இந்த பிரிவு உங்களுடைய கம்ப்யூட்டரில் இணைக்கப் பட்டிருக்கும் கிராபிக்ஸ் கார்டு குறித்த தகவல்களைக் கொடுக்கும். இதில் உள்ள Properties என்ற பிரிவில் கிளிக் செய்தால் அப்போது பயன்பட்டுக் கொண்டிருக்கும் டிரைவர் சாப்ட்வேர்கள் அனைத்தும் குறித்த தகவல்கள் கிடைக்கும்.

Monitor: மானிட்டர் திரை தன்னைத் தானே புதுப்பித்துக் கொள்ளும் ரெப்ரெஷ் ரேட்டை இங்கு அதிகப்படுத்தலாம். குறைவான ரெப்ரெஷ் ரேட் இருந்தால் அதனால் கண்களுக்குக் கெடுதல் வருமாதலால் இந்த புதுப்பிக்கும் ரேட்டினை அதிகமாக வைத்தல் நல்லதுதான். இந்த திரையில் Hide modes that this monitor cannot display என்று இருப்பதனை டிக் செய்திட வேண்டும். அதன் பின் ஆரோ அழுத்தி மெனுவினை விரித்து அதிக பட்ச ரெப்ரெஷ் ரேட்டினை அமைக்கவும். எல்.சி.டி. திரைகளுக்கு இந்த பிரச்னை இல்லை.

Troubleshoot: இதில் உள்ள Hardware acceleration slider ஐப் பயன்படுத்தி கிராபிக்ஸ் கார்ட் செயல்பாட்டை மாற்றலாம்.

Color Management: டிசைனர்கள் மற்றும் போட்டோகிராபர்கள் பலவகையான கலர் திட்டங்களை அமைக்க இந்த பிரிவு உதவுகிறது. கடைசியாக உள்ள டேப் உங்களுடைய கம்ப்யூட்டரில் உள்ள கிராபிக்ஸ் கார்டிற்கான செட்டிங்ஸ் அமைப்புகளை அமைக்க உதவுகிறது. இதனை ட்யூன் செய்வதற்கான வழிகளை அந்த கிராபிக்ஸ் கார்ட் தயாரித்த நிறுவனத்தின் இணைய தளம் சென்று பெற வேண்டும். அவ்வப்போது அந்நிறுவனம் இந்த கார்டுக்கென வழங்கும் மேம்படுத்தப்பட்ட டிரைவர் புரோகிராம்களை டவுண்லோட் செய்து சிஸ்டம் பைல்களுடன் சேர்க்க வேண்டும்.

குழந்தைகளுக்கு கூடுதல் எச்சரிக்கை வழிகள்

உங்கள் குழந்தைகளை இன்டர்நெட் பிரவுசிங்கிற்கு அறிமுகம் செய்திடுகையில் முதலில் கீழ்க்காணும் தளத்தைக் காட்டுங்கள். இவற்றின் முகவரிகளை மட்டும் போட்டு வைத்து அவற்றிற்குச் சென்று பயன்படுத்த பழக்குங்கள்.

1) www.kidscom.com : வேடிக்கைக்கும் விளையாட்டுக்கும் இந்த தளம் மிகச் சரியானது.
2) www.bbc.co.uk/cbeebies விளையாட்டுக்கள் மற்றும் குழந்தைகளே செய்து பார்க்கக் கூடிய வேடிக்கையான சமாச்சாரங்கள் கொண்டது.
3) http://kids.yahoo.com யாஹூவின் குழந்தைகளுக்கான தேடு தளம்
4) www.bbc.co.uk/schools : இது பிரிட்டிஷ் பிராட்காஸ்டிங் கார்ப்பரேஷனின் குழந்தைகளுக்கான பள்ளிகளைக் கொண்டது
5) www.channel4.com/learning : குழந்தைகளுக்கு அதிக உதவி வேண்டும் வீட்டில் செய்து முடிக்க வேண்டிய பாடங்களுக்கு உதவி செய்திடும் தளம்.

உங்கள் குழந்தைகளை இன்டர்நெட்டில் பாதுகாப்பாக பிரவுஸ் செய்திட நீங்கள் என்ன என்ன செய்திட வேண்டும் என்பது உங்களுக்குத் தெரிய வேண்டுமா? கீழ்க்காணும் தளங்களுக்குச் செல்லுங்கள்.

www.kidsmart.org.uk
www.nspcc.org.uk
www.nch.org.uk
www.safekids.com
www.protectkids.org

கீழ்க்காணும் தளங்கள் உங்கள் குழந்தைகள் இன்டர்நெட்டில் டைப் செய்வதனை அவர்களுக்குத் தெரியாமல் பதிந்து உங்களுக்குக் காட்டும். தள முகவரிகள், இமெயில்கள், சாட்டிங் உரையாடல்கள் ஆகியவற்றைக் காட்டும். கீ போர்டில் என்னவெல்லாம் டைப் செய்யப்படுகிறது என்பதையும் காட்டும்.

www.softwarexpress.com
www.cyberpatrol.com
www.riasc.net/plg.aspx
www.netnanny.com
www.naomifilter.org
www.surfsafe.co.uk

இவற்றின் மூலம் சில மோசமான தளங்களைப் பெறுவதையும் தடை செய்யலாம். பயர்பாக்ஸ் பிரவுசருக்கு glubble என்று ஒரு பிளக் இன் இணையத்தில் கிடைக்கிறது. இதன் மூலம் உங்கள் குழந்தைகள் எந்த எந்த தளத்தை மட்டும் பயன்படுத்தலாம் என்று வரையறை செய்திடலாம். இதனைப் பெற www.glubble.com என்ற முகவரியில் உள்ள தளத்திற்குச் செல்லவும்.

விண்டோஸ் இயக்கத்தில் குழந்தைகளுக்கெனத் தனியே ஒரு யூசர் அக்கவுண்ட் ஏற்படுத்தி அதன் பயன்பாட்டை வரையறை செய்திடலாம். எந்த புரோகிராமையும் பதிய முடியாமல் தடுக்கலாம். முக்கியமான பைல்களை நீக்க முடியாமல் தடை செய்யலாம். விண்டோஸ் செட்டிங்ஸ் எதனையும் மாற்றவிடாமல் அமைக்கலாம். இதற்கு Start மெனு சென்று Control Panel என்ற பிரிவில் கிளிக் செய்திடவும்.

அதில் கிடைக்கும் பல பிரிவுகளில் User Accounts என்ற பிரிவில் கிளிக் செய்திடவும். பின் Create a new account என்பதில் கிளிக் செய்து அதற்கு ஒரு பெயர் தரவும். அதனை Limited அக்கவுண்டாகத் தேர்ந்தெடுத்து பின் என்பதில் கிளிக் செய்தால் இந்த யூசர் அக்கவுண்ட் உருவாக்கித் தரப்படும். குழந்தைகளை இதில் கிளிக் செய்து பயன்படுத்த சொல்லலாம். அதற்கு முன் உங்கள் அட்மினிஸ்ட்ரேட்டர் அக்கவுண்ட்டிற்குப் பாஸ்வேர்ட் கொடுத்து குழந்தைகள் அதன் வழியாகச் செல்வதனைத் தடுக்கலாம்.

விண்டோஸ் மீடியா பிளேயர் பாடல்களை அழிப்பது எப்படி?

பாடல்கள் கேட்கவும் ஆடல்களை ரசிக்கவும் விண்டோஸ் மீடியா பிளேயர் மிக அருமையான ஒரு புரோகிராம். இதனால் இந்த புரோகிராமில் வீட்டில் அல்லது அலுவலகத்தில் கம்ப்யூட்டர் பயன்படுத்தும் ஒவ்வொருவரும் பிளே லிஸ்ட்டை உருவாக்கி அதில் ஆடல், பாடல் பைல்களை சேவ் செய்து வைக்கிறார்கள்.

சில நாட்கள் அல்லது மாதங்கள் சென்ற பின் பாடல் காட்சிகள் புளித்துப் போக அவற்றை அழிக்க எண்ணுகிறார்கள். ஆனால் வழி தெரியாமல் நீக்க முடியாமல் விட்டுவிடுகிறார்கள். அவர்களுக்கான குறிப்புகள் இதோ:


1. முதலில் விண்டோஸ் மீடியா பிளேயரைத் திறக்கவும். விண்டோஸ் மீடியா பிளேயரை உங்கள் ஆடியோ வீடியோ பைல்களுக்கான டிபால்ட் புரோகிராமாக அமைத்திருந்தால் எந்த ஆடியோ அல்லது வீடியோ பைல்களை டபுள் கிளிக் செய்தால் உடனே விண்டோஸ் மீடியா பிளேயர் திறக்கும். அல்லது ஏற்கனவே விண்டோஸ் மீடியா பிளேயருக்கான ஷார்ட் கட் ஒன்றினை டெஸ்க்டாப்பில் அமைத்திருந்தால் அதில் கிளிக் செய்தாலும் திறக்கும். இல்லை எனில் ஸ்டார்ட் கிளிக் செய்து பின் ஆல் புரோகிராம்ஸ் தேர்ந்தெடுத்து அதில் அக்செசரீஸ், என்டர்டெய்ன்மென்ட் கிளிக் செய்து வரும் மெனுவில் விண்டோஸ் மீடியா பிளேயர் என்பதில் கிளிக் செய்திடலாம். சரி, இப்போது விண்டோஸ் மீடியா பிளேயரைத் திறந்துவிட்டீர்கள்.

2. அடுத்ததாக உஙக்ள் கம்ப்யூட்டர் ஸ்கிரீனின் இடது பக்கம் “Library” என்றிருப்பதில் கிளிக் செய்து அதனைத் திறக்கவும். அடுத்து மியூசிக் ஆர்ட்டிஸ்ட், பாடல்கள், ஆல்பம் தலைப்பு அல்லது இவற்றின் பட்டியல் காட்டப்படும்.

3. அடுத்து எந்த பாடல் அல்லது ஆடல் பைலை அழிக்க எண்ணுகிறீர்களோ அந்த பைலைத் தேர்ந்தெடுக்கவும். ஒரே நேரத்தில் ஒன்றுக்கு மேற்பட்ட பைல்களை அழிப்பதற்காகத் தேர்ந்தெடுக்கலாம். பைல்கள் தேர்ந்தெடுக்கப்பட்ட பின் கீ போர்டில் உள்ள டெலீட் கீயினை அழுத்தவும். இந்த பைலை அழிக்கவா? என்று ஒரு உறுதி செய்யும் விண்டோ கேள்வியுடன் தோன்றும்.

பொதுவாக மியூசிக் பாடல்கள் லைப்ரரியிலும் மை மியூசிக் போல்டரிலும் சேவ் செய்து வைக்கப்பட்டிருக்கும். எனவே உங்களை அறியாமல் ஏதேனும் பைலை அழித்துவிட்டால் மீண்டும் அந்த பைலை பதிய வேண்டியதிருக்கும். எனவே நீங்கள் அழிக்க எண்ணும் பாடல் அதுதானா என்று உறுதி செய்து கொண்டு அழிக்கவும். உங்கள் ஹார்ட் டிஸ்க்கினை ரீ பார்மட் செய்திட திட்டமிட்டால் இந்த பாடல்களை இன்னொரு மீடியாவில் சேவ் செய்தபின் ரீ பார்மட் செய்திடலாம்.

யாஹூ இந்தியாவின் புதுவித தேடல்

யாஹூ இந்தியா தளத்தின் சர்ச் இஞ்சின் புதிய வகைத் தேடலையும் முடிவு அறிவிக்கும் வழியையும் நடைமுறைப்படுத்தி உள்ளது. Glue Pages Beta என அழைக்கப்படும் இந்த வசதி யாஹூ இந்தியா தளத்தில் (www.yahoo.in) மட்டுமே உள்ளது. ஏதாவது ஒன்றைத் தேடினால் அது சார்ந்த அனைத்து தகவல்கள், படங்கள் மற்றும் வீடியோ காட்சிகள் தொகுக்கப்பட்டு தரப்படுகிறது. எடுத்துக் காட்டாக “diabetes” என்று தேடினால் HowStuffWorks, Yahoo! Groups, Yahoo! Health, Yahoo! Answers, மற்றும் இது குறித்த blogs ஆகியவற்றிலிருந்து தகவல்கள் எடுக்கப்பட்டு தரப்படுகின்றன. மேலும் தகவல்களுக்கான தளங்களின் முகவரியும் தரப்படுகின்றன. தொடர்ந்து இன்னும் பல வகைகளின் கீழ் தகவல்களைப் பெற்றுத் தரும் வகையில் இந்த வசதி மேம்படுத்தப்படும் என்று அறிவிக்கப்பட்டுள்ளது.

எக்ஸெல் டிப்ஸ்

ஆட்டோ சம் பங்சன்

ஆட்டோ சம் எனப்படும் கால்குலேஷன் பட்டன் குறித்து அனைவரும் அறிந்திருப்பீர்கள். குறிப்பிட்ட செல்களைத் தேர்ந்தெடுத்து அதன் கீழாக உள்ள செல்லில் கர்சரைக் கொண்டு சென்று ஆட்டோ சம் பங்சனைத் தேர்ந்தெடுத்து கிளிக் செய்தால் தேர்ந்தெடுத்த செல்களில் உள்ள தகவல்களைக் கூட்டி சொல்ல பார்முலாவினை எக்ஸெல் அமைத்திடும். சரி, இதற்கு இணையான கீ போர்டு ஷார்ட் கட் எது?

மவுஸ் கிளிக் இல்லாமல் இந்த பார்முலாவை கீகளின் துணை கொண்டு அமைக்க முடியாதா? முடியும். அடுத்த முறை கூட்ட வேண்டிய தகவல்கள் உள்ள செல்களைத் தேர்ந்தெடுத்தபின் இறுதியாக உள்ள செல்லில் Alt + = எனத் தரவும். ஆஹா! ஆட்டோ சம் பங்சன் கீயை அழுத்தினால் என்ன பார்முலா அமைந்திடுமோ அதே பார்முலா அமைக்கப்பட்டுவிட்டதே.

ஸ்பெல் செக்

எக்ஸெல் ஒர்க் புக் ஒன்றில் செயல்பட்டுக் கொண்டிருக்கையில் ஸ்பெல் செக் செய்வதற்குக் கட்டளை கொடுத்தால் அப்போது எந்த ஒர்க் ஷீட் இயங்கிக் கொண்டிருக்கிறதோ அந்த ஒர்க் ஷீட்டில் உள்ள சொற்கள் மட்டும் செக் செய்யப்படும். ஒர்க் புக்கில் உள்ள மற்ற ஒர்க் ஷீட்களில் ஸ்பெல் செக் நடைபெறாது. அனைத்து ஒர்க் ஷீட்களிலும் இந்த ஸ்பெல் செக்கினை மேற்கொள்ளவும் வழி உள்ளது. முதலில் ஒர்க் புக்கில் உள்ள அனைத்து ஒர்க் ஷீட்களையும் தேர்ந்தெடுத்துக் கொள்ளுங்கள். இதற்கான குறுக்கு வழியையும் தெரிந்து கொள்ளுங்கள்.

ஏதேனும் ஒரு ஒர்க் ஷீட் டேபில் ரைட் கிளிக் செய்திடவும். விரியும் மெனுவில் Select All Sheets என்பதனைத் தேர்ந்தெடுக்கவும். இனி நம்பிக்கையோடு ஸ்பெல் செக் செய்வதற்கான கட்டளையைக் கொடுக்கவும். அனைத்து ஒர்க் ஷீட்களிலும் ஸ்பெல் செக் நடைபெறும்.

ஷார்ட் கட்ஸ்

எக்ஸெல் தொகுப்பில் செயல்படுகையில் நினைவில் வைத்துக் கொள்ள வேண்டிய சில ஷார்ட் கட் வழிகள் இங்கு தரப்படுகின்றன.
CTRL+SPACEBAR – கர்சர் இருக்கும் நெட்டு வரிசை தேர்ந்தெடுக்கப்படும்.
SHIFT+SPACEBAR : கர்சர் இருக்கும் படுக்கை வரிசை தேர்ந்தெடுக்கப்படும்.
CTRL+ HOME : ஒர்க் ஷீட்டின் தொடக்கத்திற்கு செல்ல
CTRL+END: ஒர்க்ஷீட்டின் இறுதிக்குச் செல்ல
SHIFT+F3 : பார்முலாவில் ஒரு பங்ஷனை ஒட்ட
CTRL+A: பார்முலா என்டர் செய்கையில் பங்ஷன் பெயர் டைப் செய்தவுடன் பார்முலா பேலட்டைக் காட்டும்
CTRL+A: பார்முலா என்டர் அல்லது எடிட் செய்யாதபோது அனைத்தையும் தேர்ந்தெடுக்கும்.
CTRL+‘: (சிங்கிள் லெப்ட் கொட்டேஷன் மார்க்) செல் வேல்யூ மற்றும் செல் பார்முலாவை அடுத்தடுத்துக் காணலாம்.
F11 or ALT+F1 : அப்போது உள்ள ரேஞ்ச் சார்ந்து சார்ட் தயார் செய்யப்படும்.
CTRL+; – (செமிகோலன்) தேதியை இடைச் செருக
CTRL+: (கோலன்) நேரத்தை இடைச் செருக
CTRL+ENTER : தேர்ந்தெடுக்கப்பட்ட செல் ரேஞ்சில் அப்போதைய என்ட்ரி உருவாக்க
F5: Go To டயலாக் பாக்ஸ் காட்ட
CTRL+1: Format Cells டயலாக் பாக்ஸ் காட்ட
CTRL+C : காப்பி செய்தல்
CTRL+V : ஒட்டுதல்
CTRL+Z : செயல்படுத்தியதை நீக்க
CTRL+S : சேவ் செய்திட
CTRL+P : பிரிண்ட் செய்திட
CTRL+O :புதிய பைல் திறக்க போல்டரைக் காட்டும்.

பைல் போஸ்டர் அரேஞ்ச்மென்ட்

உங்கள் கம்ப்யூட்டரில் உள்ள போல்டர்களையும் பைல்களையும் வகை வகையாக அடுக்கி வைத்திட விரும்புபவரா நீங்கள்! அப்படியானால் இந்த டிப்ஸ் உங்களுக்குத்தான். உங்களின் ஒவ்வொரு பைலையும் நீங்கள் விரும்பியபடி அடுக்கி வைத்திட மை டாகுமெண்ட்ஸ் போல்டரில் உள்ள Arrange Icons வழி தருகிறது.

இதன் வழியாக உங்கள் பைல்களை பெயர் வரிசையிலும், அளவின் அடிப்படையிலும், வகையின் அடிப்படையிலும் மற்றும் அது உருவாக்கப்பட்ட நாள் அடிப்படையிலும் அடுக்கலாம். இவ்வாறு பிரித்த பின்னர் குழுவாகவும் பிரிக்கலாம். அதற்கான வழிகளை இங்கு பார்ப்போமா!

1.முதலில் Start, My Documents எனச் செல்லவும்.
2. மை டாகுமெண்ட்ஸ் சென்றவுடன் எந்த போல்டரில் உள்ள பைல்களை அடுக்க விரும்புகிறீர்களோ அந்த போல்டரில் சிங்கிள் கிளிக் செய்திடவும்.
3. அடுத்து அந்த பக்கத்தின் உச்சியில் உள்ள டூல் பாருக்குச் செல்லவும். அங்கு சென்று View மீது கிளிக் செய்திடவும்.
4. Arrange Icons By என்ற பிரிவிற்குக் கர்சரைக் கொண்டு செல்லவும்.
5. அங்கு இரண்டு பிரிவாக ஆப்ஷன்ஸ் கிடைக்கும். முதலில் முதல் குரூப்பை நாம் பார்ப்போம். இங்கு உங்கள் விருப்பப்படி Name, Size, Type மற்றும் Date Modified என்ற நான்கில் தேர்ந்தெடுக்கவும்.

6. இனி மீண்டும் View மெனுவில் Arrange Icons By என்பதன் மூலம் இதே செயல்பாட்டினை மேற்கொள்ளவும். இப்போது இரண்டாவது குரூப் ஆப்ஷன்ஸ் பிரிவைப் பார்க்கவும். இதில் Show in Groups, Auto Arrange or Align to Grid என்றவாறு பிரிவுகளைக் காணலாம். இதில் என்ன வகையினைத் தேர்ந்தெடுப்பது என்று குழப்பமாக இருக்கிறதா; இதோ உங்களுக்கு சிறிய விளக்கங்களைத் தருகிறேன்.

1. அகர வரிசைப்படி பைல்களின் பெயர்களின் அடிப்படையில் அடுக்க: Name
2. பைல் / போல்டரின் கொள்ளளவு அடிப்படையில் அடுக்க: Size
3. வகைகளின் அடிப்படையில் (வேர்ட், எக்ஸெல், பவர்பாய்ண்ட், பி.டி.எப் போன்ற வகையில்) Type
4. இறுதியாக எடிட் செய்யப்பட்ட பைல்கள் தேதிகளின் அடிப்படையில் முதலில் வரும்படி அமைத்திட Modified

5. அகர வரிசைப்படி குரூப்கள் அமைத்திட Show in Groups

6. தானாக நெட்டு மற்றும் படுக்கை வரிசைகளில் பைல் கள் அடுக்கப்பட Auto Arrange

7. காட்டப்படாத கிரிட் பாய்ண்ட்களுக்கு ஏற்றவகையில் படுக்கை நெட்டு வரிசைகளில் அடுக்கிட Align to Grid இந்த இரண்டு பிரிவுகளிலும் உங்கள் ஆப்ஷன்ஸ் தேர்ந் தெடுத்துவிட்டால் உடனே பைல்கள் அடுக்கப்பட்டுவிடும்.)

அனைவருக்குமான ஆன்லைன் பாதுகாப்பு

www.staysafe.org/ என்ற முகவரியில் உள்ள இந்த தளம் சென்று இதில் காணப்படும் தகவல்களை அவசியம் இன்டர்நெட்டில் பிரவுஸ் செய்திடும் ஒவ்வொருவரும் அறிந்து கொள்ள வேண்டும். இன்டர்நெட்டில் பயணிக்கையில் பாதுகாப்பாக பிரவுஸ் செய்ய வேண்டியது மிக மிக அவசியமாக உள்ளது.

நம் பெர்சனல் தகவல்களை நமக்குத் தெரியாமல் தூண்டில் போட்டு பிடிக்கும் பிஷ்ஷர்கள் ஒருபுறம், ஆன்லைன் திருடர்கள் மறுபுறம், வந்து ஜம்மென்று நம் கம்ப்யூட்டரில் அமர்ந்து நாச வேலைகளைச் செய்திடத் திட்டமிட்டு இன்டர்நெட்டில் அடையாளம் காட்டாத வைரஸ் பேய்கள் ஒருபுறம் என பல ஆபத்திற்கு நடுவில் நாம் பாதுகாப்பான பயணத்தை மேற்கொள்ள வேண்டியதுள்ளது.

பாதுகாப்பினை எந்த வழிகளிலெல்லாம் மேற்கொள்ள வேண்டும் என்பது குறித்து பல வகைகளில் பல்வேறு வயதினருக்கு என குழு பிரித்து ஒரு தளம் அறிவுரை கூறுகிறது. http://www.staysafe.org/ என்ற முகவரியில் உள்ள இந்த தளம் சென்று இதில் காணப்படும் தகவல்களை அவசியம் இன்டர்நெட்டில் பிரவுஸ் செய்திடும் ஒவ்வொருவரும் அறிந்து கொள்ள வேண்டும். இதில் சிறப்பான தகவல் என்னவெனில் பாதுகாப்பு வழிகள் அனைத்தும் வயது வாரியாகத் தரப்பட்டிருப்பதுதான். அந்த அந்த வயதில் எத்தகைய தளங்களைப் பார்வையிடுவார்கள் என்று கணக்கிட்டு அதில் எத்தகைய ஆபத்து இருக்கலாம் என்ற எச்சரிக்கையுடன் பாதுகாப்பு வழிகள் தரப்பட்டுள்ளன.

1. இளம் வயதினர் (Teenagers) : இந்த பிரிவில் இளம் வயதினர் எவ்வாறு பொறுப்பாக இணையத்தில் வலம் வர வேண்டும் என்பதில் தொடங்கி மியூசிக் மற்றும் வீடியோ டவுண்லோடிங், ஆன் லைனில் வருபவர்களிடம் சில்மிஷம் செய்தல் போன்றவை குறித்து அறிவுரை வழங்கப்படுகிறது. இளம் வயதினர் ஒவ்வொருவருக்கும் ஒரு அறிவுரை கிடைக்கிறது. இளம் வயதினர்கள் சிலர் இணையத்தில் பாதுகாப்பு குறித்து எடுத்த வீடியோ காட்சிகளும் இதில் பார்ப்பதற்கு உள்ளன.

2. பெற்றோர்கள் (Parents) : ஒவ்வொரு பெற்றோருக்கும் தங்கள் குழந்தைகளை வழி நடத்தும் பொறுப்பு உள்ளதைச் சுட்டிக் காட்டி இணையத்தில் குழந்தைகளை எவ்வாறு வழி நடத்த வேண்டும் என்பது குறித்தும் அதற்கான தளங்கள் குறித்தும் அறிவுரை தரப்படுகிறது. அத்துடன் ஆண்டி வைரஸ் புரோகிராம், பயர்வால், ஸ்பைவேருக்கு எதிரான பாதுகாப்பினை எப்படி ஏற்படுத்துவது என்பது குறித்த வழிகளும் உள்ளன.

3. ஐம்பது வயதிற்கு மேல் (50+) : ஐம்பதிலும் ஆசை வரும் என்ற பாடல் கேட்டதுண்டா? இந்த பிரிவில் கம்ப்யூட்டரில் எப்படி பெர்சனல் தகவல்களை ஐம்பது வயதிற்கு மேலே உள்ளவர்களைக் குறி வைத்து பிடிக்கின்றனர் என்று காட்டப்பட்டுள்ளது.

4. கல்வியாளர்கள் கற்றுக் கொடுக்கும் ஆசிரியர்களுக்கென ஒரு தனிப் பிரிவினை உண்டாக்கி அவர்கள் மாணவர்களுக்கு பிரவுசிங் பாதுகாப்பு குறித்து என்ன என்ன சொல்லித் தர வேண்டும் என்று பட்டியலிடுகிறது இந்த தளம். மாணவர்களுக்குக் கம்ப்யூட்டர் பயன்பாட்டினைக் கற்றுக் கொடுத்து அவர்களைக் கம்ப்யூட்டர் பயன்படுத்தும்படி ஈடுபடுத்துவது நல்லதுதான். அதே நேரத்தில் இன்டர்நெட்டின் தன்மை மற்றும் ஆபத்துக்களையும் சொல்லி வைக்க வேண்டியதுள்ளது. இதை எல்லாம் இந்த பிரிவு தருகிறது.

5. இந்த பிரிவுகளோடு The Toolbox என்று ஒரு பிரிவு உள்ளது. இதில் பாதுகாப்பிற்கான சாதனங்களையும் புரோகிராம்களையும் எப்படி பயன்படுத்துவது எனக் காட்டப்படுகிறது. Firewalls, Antivirus, Parental controls, Networking மற்றும் External storage devices ஆகியன குறித்து விரிவான விளக்கங்கள் தரப்பட்டுள்ளன. கம்ப்யூட்டர் பயன்படுத்தும் ஒவ்வொருவரும் அவசியம் தெரிந்து கொள்ள வேண்டிய பாதுகாப்பு வழிகள் அனைத்தும் கொண்டுள்ள இந்த தளத்திற்குக் கட்டாயம் நீங்கள் செல்ல வேண்டும்.